ടെസ്റ്റ് പ്രകടനത്തിലെ സ്ഥിരതയില്ലായ്മയിൽ ഒരുപാട് തവണ പഴി കേൾക്കേണ്ടി വന്ന താരമാണ് രോഹിത് ശർമ്മ. വിമർശനങ്ങളിൽ അടിപതറാത്ത ടീമിന് ശക്തി പകരാൻ നായകൻ എന്ന നിലയിൽ രോഹിത്തിന് സാധിച്ചിട്ടുണ്ട്. എന്നാൽ സജീവ ക്രിക്കറ്റിൽ നിന്ന് താരമെന്ന് വിരമിക്കും എന്നതിനെ കുറിച്ചുള്ള ചർച്ചകളൊന്നും ഇന്നേ വരെ ആരാധകർക്കിടയിൽ ചർച്ചയായിട്ടില്ല. ധരംശാലയിലെ വിജയത്തിന് പിന്നാലെ താൻ ക്രിക്കറ്റിൽ നിന്ന് എപ്പോൾ വിരമിക്കും എന്നതിനെ കുറിച്ച് തുറന്ന് പറഞ്ഞിരിക്കുകയാണ് രോഹിത് ശർമ്മ.
‘ഒരു ദിവസം ഉണർന്ന് കഴിയുമ്പോൾ എനിക്ക് ക്രിക്കറ്റ് കളിക്കാൻ കഴിയില്ലെന്ന് തോന്നിയാൽ ഞാൻ അന്ന് കളിനിർത്തും. അപ്പോൾ തന്നെ ഈ വിവരം ബന്ധപ്പെട്ടവരെ അറിയിക്കും. എന്നാൽ കഴിഞ്ഞ രണ്ട് – മൂന്ന് വർഷമായി ഞാൻ മികച്ച പ്രകടനമാണ് പുറത്തെടുക്കുന്നത്. കരിയർ ഗ്രാഫും ഉയർന്നു. അതുകൊണ്ട് ഇപ്പോൾ മറ്റൊന്നിനെ കുറിച്ചും ചിന്തിക്കുന്നില്ല. -രോഹിത് പറഞ്ഞു.
സ്വാതന്ത്ര്യത്തോടെ കളിക്കുന്ന താരങ്ങളുടെ പ്രകടനം ഞാൻ ആസ്വദിക്കുകയാണ്. അക്കങ്ങൾ നോക്കി വിലയിരുത്തുന്ന വ്യക്തിയല്ല ഞാൻ. മികച്ച സ്‌കോർ നേടുകയെന്നത് വളരെ പ്രധാനപ്പെട്ട കാര്യമാണ്. വ്യക്തിഗത പ്രകടനത്തിന് അപ്പുറത്തേക്ക് മികച്ച പ്രകടനം കാഴ്ചവയ്‌ക്കാനാണ് ശ്രമിക്കേണ്ടത്. ക്രീസിൽ സെഞ്ച്വറിയോ അർദ്ധ സെഞ്ച്വറിയോ ലഭിക്കുമോ എന്നതിനെ പറ്റിയല്ല ചിന്തിക്കേണ്ടത്. മികച്ച പ്രകടനം കാഴ്ച വക്കുന്നതിനെ പറ്റിയാണ്. അങ്ങനെ ചെയ്താൽ സ്‌കോറും നേടാനാകുമെന്നും രോഹിത് പറഞ്ഞു.
