ന്യൂഡൽഹി: ഇന്ത്യൻ മഹാസമുദ്രത്തിൽ കടൽകൊള്ളക്കാരെ തുരത്താനായി ഭാരതയ നാവികസേന നടത്തുന്ന പ്രവർത്തനങ്ങളെ അഭിനന്ദിച്ച് യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിൻ. പ്രതിരോധമന്ത്രി രാജാനാഥ് സിംഗുമായി ടെലിഫോൺ സംഭാഷണം നടത്തിയ വേളയിലായിരുന്നു അദ്ദേഹത്തിന്റെ പരാമർശം.
ഉഭയകക്ഷി ചർച്ചകളും ആഭ്യന്തര സുരക്ഷയും പ്രതിരോധ സഹകരണവും ഇരു നേതാക്കൾ ചർച്ച ചെയ്തു. കഴിഞ്ഞ മാസം ഡൽഹിയിൽ നടന്ന ഇൻഡസ്-എക്സ് ഉച്ചകോടിയിൽ പറഞ്ഞ കാര്യങ്ങൾ വിലയിരുത്തുകയും ചെയ്തു. ഇന്ത്യൻ കപ്പൽശാലകളിലെ യുഎസ് നാവിക കപ്പലുകളുടെ അറ്റകുറ്റപ്പണികൾ നടത്തുന്നത് സംബന്ധിച്ച കാര്യങ്ങളും ഇരുവരും ചർച്ച ചെയ്തുവെന്നാണ് റിപ്പോർട്ട്.
ഇരു രാജ്യങ്ങളും സംയുക്തമായി നടത്തുന്ന സേനാ അഭ്യാസമായ ടൈഗർ ട്രയംഫ് സംബന്ധിച്ചും ചർച്ച നടന്നു. ഇന്നലെ ആരംഭിച്ച അഭ്യാസം ഈ മാസം 31 വരെ നീളും. ഇന്ത്യും യുഎസും തമ്മിലുള്ള നയതന്ത്ര-പ്രതിരോധ സഹകരണം ഊട്ടിയുറപ്പിക്കുന്നതാകും അഭ്യാസം.
