ന്യൂഡൽഹി: സ്റ്റാർട്ടപ്പ് മഹാകുംഭ് പരിപാടിയിൽ പങ്കെടുത്ത് പ്രധാനമന്ത്രി നരേന്ദ്രമോദി. ഡൽഹിയിലെ ഭാരത് മണ്ഡപത്തിലാണ് സ്റ്റാർട്ടപ്പ് മഹാകുംഭ് ഇവൻ്റ് നടക്കുന്നത്. ഈ മാസം 18-നാണ് സ്റ്റാർട്ടപ്പ് മഹാകുംഭ് ആരംഭിച്ചത്. ഭാരത് മണ്ഡപത്തിൽ സംഘടിപ്പിച്ചിരുന്ന
സ്റ്റാർട്ടപ്പ് മഹാകുംഭ് പ്രദർശനും പ്രധാനമന്ത്രി സന്ദർശിച്ചു. വാണിജ്യ, വ്യവസായ മന്ത്രി പിയൂഷ് ഗോയലിനോടൊപ്പം വ്യവസായികളുമായി അദ്ദേഹം സംവദിക്കുകയും ചെയ്തു.
ന്യൂഅപെക്‌സ് ഇൻഡസ്‌ട്രി അസോസിയേഷൻ, ബൂട്ട്‌സ്‌ട്രാപ്പ് ഇൻകുബേഷൻ ആൻഡ് അഡ്വൈസറി ഫൗണ്ടേഷൻ, ഇന്ത്യൻ വെഞ്ച്വർ ആൻഡ് ആൾട്ടർനേറ്റ് ക്യാപിറ്റൽ അസോസിയേഷൻ എന്നിവർ ചേർന്നാണ് സ്റ്റാർട്ടപ്പ് മഹാകുംഭ് സംഘടിപ്പിച്ചിരിക്കുന്നത്.
1,000-ലധികം നിക്ഷേപകർ, നിരവധി ബിസിനസ് പ്രമുഖർ, വിവിധ രാജ്യങ്ങളിൽ നിന്നുള്ള
പ്രതിനിധികൾ എന്നിവർ സ്റ്റാർട്ടപ്പ് മഹാകുംഭ് ഇവന്റിൽ പങ്കെടുത്തു.
നിക്ഷേപകരേയും ബിസിനസ് സംരംഭകരേയും പ്രധാനമന്ത്രി അഭിസംബോധന ചെയ്തു. അടുത്തിടെ, രാജ്യത്തെ പ്രമുഖ വ്യവസായികളുമായി പിയൂഷ് ഗോയൽ സ്റ്റാർട്ടപ്പ് മഹാകുംഭിനെ കുറിച്ച് വിശദമായ ചർച്ചകൾ നടത്തിയിരുന്നു. സ്റ്റാർട്ടപ്പുകൾ വ്യവസായ മേഖലകളിൽ വിപ്ലവം സൃഷ്ടിക്കുമെന്നും രാജ്യത്തെ സാമ്പത്തിക വളർച്ചയ്‌ക്ക് സഹായിക്കുമെന്നും ചർച്ചകൾക്ക് ശേഷം പിയൂഷ് ഗോയൽ മാദ്ധ്യമപ്രവർത്തകരോട് പ്രതികരിച്ചു.
