ഭക്തിയുടെ പാതയില്‍ സഞ്ചരിച്ച് കൊണ്ട് തന്നെ മലയാളികള്‍ക്കായി ഏറ്റവും പ്രിയപ്പെട്ട പാട്ടുകള്‍ ഒരുക്കിയവരാണ് ജയവിജയന്മാര്‍. ഭക്തിയുടെ പാരമ്യത്തില്‍ നില്‍ക്കുന്നതാണ് ഇവര്‍ ഒരുക്കിയ പാട്ടുകളില്‍ ഭൂരിപക്ഷവും. കുഞ്ഞിലേ മുതല്‍ ഭക്തിഗാനങ്ങള്‍ പാടുമായിരുന്ന ജയവിജയന്മാര്‍ ആദ്യമായി സംഗീതം കൊടുക്കുന്നതും ഒരു ഭക്തിഗാനത്തിനാണ്. ഇഷ്ടദൈവമേ സ്വാമി ശരണമയ്യപ്പാ എന്ന് തുടങ്ങുന്ന ഗാനം ഇന്നും നമുക്കെല്ലാം ഏറെ പ്രിയങ്കരമാണ്. ആദ്യഗാനം ജനപ്രിയമായതോടെ തുടര്‍ച്ചയായി ഭക്തിഗാനങ്ങള്‍ ചെയ്തു.
ഗുരുവായൂര്‍ കണ്ണന്റെ നടയില്‍ എപ്പോഴും മുഴങ്ങി കേള്‍ക്കാറുള്ള കൃഷ്ണ കൃഷ്ണ മുകുന്ദ ജനാര്‍ദ്ദനാ എന്ന ജ്ഞാനപ്പാനയിലെ വരികള്‍ക്ക് സംഗീതം കൊടുത്തത് ജയവിജയന്മാരാണ്. അയ്യപ്പനാണ് ഇഷ്ടദൈവമെന്ന് പല അഭിമുഖങ്ങളിലും ജയന്‍ തുറന്ന് പറഞ്ഞിട്ടുണ്ട്. ശബരിമല ദേവസ്വം ബോര്‍ഡ് പുറത്തിറക്കിയ ഒരേയൊരു ഭക്തിഗാന ആല്‍ബമായ ‘ശബരിമല അയ്യപ്പനിലെ’ ഹിറ്റായ ഗാനങ്ങളെല്ലാം ഈ സഹോദരന്മാരുടെ കഴിവില്‍ ഉരുത്തിരിഞ്ഞവയാണ്. സന്നിധാനത്ത് നട തുറക്കുമ്പോള്‍ കേള്‍ക്കുന്ന ശ്രീകോവില്‍ നട തുറന്നു എന്ന ഗാനം ഇവര്‍ ഈണമിട്ട് പാടിയതാണ്. ജയവിജയന്മാര്‍ സംഗീതം നല്‍കി പി.ലീല പാടിയ ഇഷ്ടദൈവമേ സ്വാമി ശരണമയ്യപ്പാ എന്നതാണ് ഇതിലെ മറ്റൊരു ഹിറ്റ് ഗാനം.
സംഗീത യാത്രകളിലെല്ലാം ഒരുമിച്ചായിരുന്നു ജയവിജയന്മാര്‍ എന്നും സഞ്ചരിച്ചിട്ടുള്ളത്. പതിവായി പന്തളത്ത് നിന്നുള്ള തിരുവാഭരണ ഘോഷയാത്ര ശബരിമല സന്നിധാനത്തേക്ക് എത്തിച്ചേരുന്ന വേളയില്‍ ജയനും വിജയനും അയ്യപ്പന്മാര്‍ക്കായി ഭക്തിഗാനവിരുന്ന് ഒരുക്കും. ഇരുവരും ചേര്‍ന്ന് ആലപിക്കുന്ന അയ്യപ്പഭക്തിഗാനങ്ങള്‍ ലക്ഷങ്ങളാണ് മനസിലേക്ക് ഏറ്റുവാങ്ങിയിരുന്നത്. 42 വര്‍ഷമാണ് ഇരുവരും ഒരുമിച്ച് ശബരിമലയില്‍ പാടിയിട്ടുള്ളത്.
എന്നാല്‍ 1988ല്‍ മകരവിളക്ക് ഉത്സവത്തിന് ഇരുവരുടേയും ഭക്തിഗാനസുധ ഉണ്ടായിരുന്നില്ല. അതേവര്‍ഷം ജനുവരിയിലായിരുന്നു വിജയന്റെ വിയോഗം. തൃശ്ശിനാപ്പള്ളിയില്‍ കച്ചേരിക്ക് പോകുന്നതിനിടെ ഹൃദയാഘാതം മൂലമായിരുന്നു വിജയന്റെ വേര്‍പാട്. കര്‍മങ്ങള്‍ കഴിഞ്ഞ് അസ്ഥി നിമഞ്ജനം ചെയ്തത് പമ്പയിലായിരുന്നു. മകരസംക്രമ ദിവസമായിരുന്നു അന്ന്. വിജയന്‍ അയ്യപ്പനില്‍ ലയിച്ചുവെന്ന് വിശ്വസിക്കാനാണ് താന്‍ ഇഷ്ടപ്പെടുന്നതെന്നാണ് ജയന്‍ പറയാറുള്ളത്.
സംഗീതത്തെ പോലും മറന്ന് നിന്നിരുന്ന ആ നാളുകളില്‍ നിന്ന് ജയനെ പുറത്തേക്കെത്തിച്ചത് യേശുദാസ് ആണ്. എസ്.രമേശന്‍ നായര്‍ രചിച്ച് യേശുദാസ് പാടിയ പാട്ടുകള്‍ ഉള്‍പ്പെടുത്തിയ മയില്‍പ്പീലി എന്ന കാസറ്റ് വലിയ ഹിറ്റുകളിലൊന്നായി മാറി. ചന്ദനചര്‍ച്ചിത നീല കളേബര, രാധ തന്‍ പ്രേമത്തോടാണോ, അണിവാകച്ചാര്‍ത്തില്‍ ഞാന്‍, ചെമ്പൈക്ക് നാദം നിലച്ചപ്പോള്‍, യമുനയില്‍ ഖരഹരപ്രിയ എന്നീ ഗാനങ്ങള്‍ ഇന്നും മലയാളികള്‍ നെഞ്ചിലേറ്റി സൂക്ഷിക്കുന്നു.
സംഗീതലോകത്തിന് നല്‍കിയ സംഭാവനകള്‍ മാനിച്ച് 2019ല്‍ രാജ്യം അദ്ദേഹത്തെ പത്മശ്രീ നല്‍കി ആദരിച്ചു. തനിക്ക് ലഭിച്ച ഈ ഭാഗ്യം അയ്യപ്പന്റെ അനുഗ്രഹമാണെന്നാണ് അദ്ദേഹം അന്ന് പ്രതികരിച്ചത്. തന്റെ ജീവിതം തന്നെ അയ്യപ്പനില്‍ സമര്‍പ്പിച്ച് കൊണ്ടായിരുന്നു അദ്ദേഹം ഒരു ചുവടും മുന്നോട്ട് വച്ചിരുന്നത്. ഹരിവരാസനം ശതാബ്ദി ആഘോഷ സമിതിയുടെ രക്ഷാധികാരി കൂടിയായിരുന്നു കെ ജി ജയന്‍. ശബരിമല അയ്യപ്പ സേവാസമാജത്തിന്റെ സംസ്ഥാന അദ്ധ്യക്ഷനായി പ്രവര്‍ത്തിച്ചിട്ടുണ്ട്. അയ്യപ്പസേവാസമാജത്തിന്റെ സംസ്ഥാനത്തെ ആദ്യ അദ്ധ്യക്ഷനും ഇദ്ദേഹമാണ്.
