കോഴിക്കോട്: തെരഞ്ഞെടുപ്പ് പ്രചാരണത്തിന്റെ ഭാഗമായി കോൺഗ്രസ്സും, യുഡിഎഫും വർഗീയ വിദ്വേഷം പ്രചരിപ്പിക്കുകയാണെന്ന ആരോപണവുമായി ബിജെപി. യുഡിഎഫ് സ്ഥാനാർത്ഥി എം കെ രാഘവന്റെ പ്രചരണാർത്ഥം നഗരത്തിൽ സ്ഥാപിച്ച കൂറ്റൻ ഹോർഡിങ്സുകളിലെ മതവിദ്വേഷവും, രാജ്യവിരുദ്ധ പരാമർശങ്ങളും ചൂണ്ടിക്കാട്ടി ബിജെപി ജില്ലാ അദ്ധ്യക്ഷൻ വി കെ സജീവൻ തെരഞ്ഞെടുപ്പ് കമ്മീഷന് പരാതി നൽകി.
പൗരത്വ ഭേദഗതി നിയമം, മണിപ്പൂർ കലാപം, ഏകീകൃത സിവിൽ കോഡ് തുടങ്ങിയ വിഷയങ്ങൾ പരാമർശിക്കുന്ന ബോർഡ് ജനങ്ങളെ തെറ്റിദ്ധരിപ്പിക്കുന്നതും, കേന്ദ്ര സർക്കാരിനെതിരെ ജനങ്ങളിൽ ശത്രുത വളർത്തുന്നതാണെന്നും പരാതിയിൽ ചൂണ്ടിക്കാട്ടുന്നു. ഏകീകൃത സിവിൽ കോഡ്, കേന്ദ്ര സർക്കാർ ജനങ്ങളെ ഭിന്നിപ്പിക്കാൻ ഉപയോഗിക്കുന്നുവെന്നാണ് ഹോർഡിങ്‌സിൽ എഴുതിയിരിക്കുന്നത്. രാജ്യവിരുദ്ധവും, ജനങ്ങളെ ഭിന്നിപ്പിക്കാൻ ലക്ഷ്യമിട്ടിട്ടുള്ളതുമായ ബോർഡ് തെരഞ്ഞെടുപ്പ് ചട്ടങ്ങളുടെ നഗ്നമായ ലംഘനമാണെന്നും പരാതിയിൽ പറയുന്നു.
ന്യൂനപക്ഷ വിഭാഗങ്ങൾക്കിടയിൽ ഭീതി ജനിപ്പിക്കാനും, കോഴിക്കോടിന്റെ സാമൂഹിക സമരസത നശിപ്പിക്കാനും ലക്ഷ്യമിട്ടുള്ള ബോർഡ്, യുഡിഎഫ് സ്ഥാനാർഥി എംകെ രാഘവന്റെ അറിവോട് കൂടിയാണെന്നും, കുറ്റക്കാർക്കെതിരെ കർശനമായ നിയമ നടപടികൾ സ്വീകരിക്കണമെന്നും, ബോർഡ് നീക്കാനുള്ള നടപടികൾ ഉടനടി സ്വീകരിക്കണമെന്നും വികെ സജീവൻ പരാതിയിൽ ആവശ്യപ്പെട്ടു.
