മനാമ ബഹറൈൻ ഇന്ത്യ കൾച്ചറൽ ആൻഡ് ആർട്സ് സൊസൈറ്റിയുടെ ആഭിമുഖ്യത്തിൽ സൽമാബാധിലെ ഗൾഫ് എയർ ക്ലബ്ബിൽ നടന്ന വിഷു മഹോത്സവത്തിൽ വൻ ജനപങ്കാളിത്തം. ബഹറൈൻ ടൂറിസം ആൻഡ് എക്സിബിഷൻ അതോറിറ്റി സി.ഇ.ഒ സാറാ അഹമ്മദ് ബുഹജി ചടങ്ങിൽ വിശിഷ്ടാതിഥിയായി. ദേവി ജി ഗ്രൂപ്പ് ജോയിന്റ് മാനേജിംഗ് ഡയറക്ടർ ജയദീപ് ഭരത്ജി, ബികാസ് പ്രസിഡന്റ് ഭഗവാൻ അസർ പോട്ട, വിഷു മഹോത്സവം രക്ഷാധികാരി രാജേഷ് നമ്പ്യാർ,ഐസിആർഎഫ് ജന.സെക്രട്ടറി പങ്കജ് മാലിക് തുടങ്ങിയ സാമൂഹിക സംഘടന പ്രതിനിധികൾ ചടങ്ങിൽ പങ്കെടുത്തു.
ഇന്ത്യയും ബഹറൈനും തമ്മിലുള്ള സാംസ്കാരിക ബന്ധത്തെക്കുറിച്ചും ഇരു രാജ്യങ്ങളും തമ്മിലുള്ള ടൂറിസം മേഖലയിലെ സഹകരണത്തെക്കുറിച്ചും സാറാ അഹമ്മദ് ബുഹജി സംസാരിച്ചു. ബികാസ് പ്രസിഡന്റ് ഭഗവാൻ അസർ പോട്ട സാറാ അഹമ്മദ് ബുഹജിക്ക് സ്നേഹോപഹാരം നൽകി.പൊതുസമ്മേളനത്തിനുശേഷം കുട്ടികൾ അവതരിപ്പിച്ച 25ലേറെ കലാപ്രകടനങ്ങൾ വേദിയെ വിസ്മയിപ്പിച്ചു. വെള്ളിയാഴ്ച വൈകിട്ട് മൂന്നിനാരംഭിച്ച പരിപാടി രാത്രി 10 മണിവരെ നീണ്ടു.
