മനഃസാക്ഷി മരവിപ്പിക്കുന്നൊരു സംഭവത്തിന്റെ വാർത്തയാണ് മദ്ധ്യപ്രദേശിലെ ജബൽപൂരിൽ നിന്ന് പുറത്തുവരുന്നത്. സ്റ്റണ്ടിംഗിനിടെ ബൈക്ക് മരത്തിലേക്ക് പാഞ്ഞുകയറി തീപിടിച്ച് കത്തിച്ചാമ്പലായി. ബൈക്കിലുണ്ടായിരുന്ന 18-കാരനും വെന്തുമരിച്ചു. ബാർഗി നഗർ ഔട്ട്പോസ്റ്റിലായിരുന്നു സംഭവം.യഷ് എന്ന യുവാവാണ് മരിച്ചത്.
അമിതവേഗതയിലായിരുന്ന ബൈക്ക് നിയന്ത്രണം തെറ്റി മരത്തിലിടിച്ചു കയറുകയായിരുന്നു. യുവാവിന്റെ കൈയിലിരുന്ന സിഗററ്റ് ഉണങ്ങിയ ഇലകളിൽ വീണാണ് ബൈക്കിന് തീപിടിച്ചത്. മൂന്നു സുഹൃത്തുക്കൾക്കൊപ്പം ബാർഗിയിലേക്ക് വരവേയായിരുന്നു അപകടം. മൂവരും അമിത വേഗത്തിലാണ് ബൈക്ക് ഓടിച്ചിരുന്നത്. ആയുഷും നവ്ജ്യോതും മുന്നിലും യഷ് പിന്നാലുമായിരുന്നു.
ഏറെ ദൂരം പോയിട്ടും യഷിനെ കാണാതായതോടെ മറ്റു രണ്ടുപേരും തിരികെ വന്നു നോക്കുമ്പോൾ ആൾക്കൂട്ടവും യഷിന്റെ ബൈക്ക് കത്തിയെരിയുന്നതും കണ്ടു. നാട്ടുകാർ വിവരം അറിയിച്ചതനുസരിച്ച് സ്ഥലത്തെത്തിയ പൊലീസ് യുവാവിന്റെ മരണവിവരം ബന്ധുക്കളെ അറിയിച്ചു. മൂന്നു സുഹൃത്തുക്കളും ഒരേ കോളനിയിലെ താമസക്കാരാണ്.