ദുബായ്: വിവിധ രാജ്യങ്ങളിൽ നിന്നുള്ള 111,000ത്തിലധികം തൊഴിലാളികളെ പങ്കെടുപ്പിച്ച് ദുബായിൽ അന്താരാഷ്ട്ര തൊഴിലാളി ദിനാചരണം നടത്തി. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) ആണ് ചടങ്ങുകൾ സംഘടിപ്പിച്ചത്. കായികം, വിനോദം, ബോധവത്കരണം, സംസ്കാരം, ആരോഗ്യം എന്നിവ ഉൾക്കൊള്ളുന്ന വൈവിധ്യമാർന്ന പരിപാടികളിൽ 8 കമ്പനികളെ പ്രതിനിധീകരിച്ച് 111,000ത്തിലധികം തൊഴിലാളികൾ പങ്കെടുത്തു. എമിറേറ്റ്സിന്റെ വിവിധ ഭാഗങ്ങളിൽ നടന്ന പരിപാടികൾക്ക് ജിഡിആർഎഫ്എ ദുബായ് ഉപമേധാവി മേജർ ജനറൽ ഉബൈദ് മുഹൈർ ബിൻ സുറൂർ, മേജർ ജനറൽ ഡോ. അലി ബിൻ അജീഫ്, കമ്പനികളിലെ ഉന്നത ഉദ്യോഗസ്ഥർ നേതൃത്വം നൽകി.
രാവിലെ 10 മണി മുതൽ രാത്രി 8 മണി വരെ നീണ്ടുനിന്ന പരിപാടികളിൽ സാംസ്കാരിക പരിപാടികൾ, കായിക മത്സരങ്ങൾ, സമ്മാനദാന ചടങ്ങുകൾ എന്നിവ നടന്നു.. ചടങ്ങിൽ പങ്കെടുത്ത തൊഴിലാളികളെ ആദരിച്ചു. “മഹത്തായ മൂല്യങ്ങളും പാരമ്പര്യങ്ങളും സഹിഷ്ണുതയും ഉൾക്കൊള്ളുന്നതാണ് യുഎഇ സമൂഹത്തിന്റെ ഒരു സവിശേഷതയെന്ന് മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു.
ഈ മൂല്യങ്ങളെ അടിസ്ഥാനമാക്കിയാണ് രാജ്യത്തിന്റെ നേതാക്കൾ പുരോഗതിക്ക് അടിത്തറ പാകിയത്. ഇന്ന് ലോകമെമ്പാടുമുള്ളവർക്ക് മികച്ച ഭാവി നിർമ്മിക്കാൻ ആഗ്രഹിക്കുന്നവർക്ക് യുഎഇ ഒരു പ്രചോദനമായി മാറിയിരിക്കുന്നു. തൊഴിലാളി ദിനം ആഘോഷിക്കുന്നത് ഇമാറത്തിന്റെ വികസനത്തിനും പുരോഗതിക്കും സംഭാവന നൽകുന്ന തൊഴിലാളികളോടുള്ള നമ്മുടെ അഗാധമായ നന്ദിയുടെ പ്രതീകമാണെന്നും അദ്ദേഹം പറഞ്ഞു.
