ബെംഗളൂരു: ജപ്പാനിൽ നിന്ന് ബെംഗളൂരുവിലേക്ക് താമസം മാറിയതായി ടെക് ജപ്പാൻ സ്ഥാപകനും സിഇഒയുമായ നൗട്ടക നിഷിയാമ. ലോകത്തിന് ഇന്ത്യയുടെ നേതൃത്വം ആവശ്യമാണെന്നും രാജ്യത്തെ വൈവിധ്യങ്ങൾ തന്നെ അത്ഭുതപ്പെടുത്തുന്നതാണെന്നും നിഷിയാമ പറഞ്ഞു. ലിങ്ക്ഡിനിൽ പങ്കുവെച്ച കുറിപ്പിലായിരുന്നു നിഷിയാമയുടെ വാക്കുകൾ. താമസം മാറി ഒരു മാസം പിന്നിടുമ്പോൾ തനിക്ക് വളരെയധികം സന്തോഷം തോന്നുന്നുവെന്നും ഇന്ത്യയിലുള്ള ജീവിതം തികച്ചും വ്യത്യസ്തമാണെന്നും അദ്ദേഹം പറഞ്ഞു.
” ജപ്പാനിൽ നിന്ന് ബെംഗളൂരുവിലേക്ക് താമസം മാറി ഇന്നേക്ക് ഒരു മാസം തികയുന്നു. വൈവിധ്യങ്ങൾ നിറഞ്ഞ രാജ്യമാണ് ഇന്ത്യ. എന്റെ ജീവിതത്തിൽ പുതിയ അദ്ധ്യായം ഭാരതത്തിൽ നിന്ന് തുറന്നിരിക്കുന്നു. ഇന്ത്യയുടെ നേതൃത്വം ലോകത്തിന് ഇന്ന് അനിവാര്യമാണെന്ന് തെളിയിക്കുന്നതാണ് ഇവിടുത്തെ ഓരോ മാറ്റങ്ങളും.”- നൗട്ടക നിഷിയാമ കുറിച്ചു.
വ്യത്യസ്ത ജാതി-മത വർഗത്തിൽപ്പെടുന്ന ജനങ്ങളാണ് ഇന്ത്യയിലുള്ളത്. അവർ കേവലം ചെറിയൊരു ചട്ടക്കൂടിനുള്ളിൽ നിന്ന് പ്രവർത്തിക്കാൻ ആഗ്രഹിക്കുന്നില്ല. അവരുടെ ചിന്തകളും ആശയങ്ങളും വലുതാണെന്നും ഓരോരുത്തരും വ്യക്തിഗതമായി പ്രവർത്തിച്ച് ഇന്ത്യയെ മുന്നോട്ടു നയിക്കുന്നതിനുള്ള സംഭാവനകൾ നൽകുന്നുണ്ടെന്നും നിഷിയാമ കൂട്ടിച്ചേർത്തു. ഇന്ത്യയിലുള്ള വൈവിധ്യങ്ങൾ തന്നെ ശരിക്കും അത്ഭുതപ്പെടുത്തുന്നതാണെന്നും ഇവയെല്ലാം ജപ്പാനിൽ നിന്ന് തികച്ചും വ്യത്യസ്തമാണെന്നും അദ്ദേഹം വ്യക്തമാക്കി.
വളർന്നു വരുന്ന ഇന്ത്യൻ സാങ്കേതികവിദ്യകളെയും അദ്ദേഹം ചൂണ്ടിക്കാണിച്ചു. ഗൂഗിൾ സിഇഒ സുന്ദർപിച്ചൈ മൈക്രോസോഫ്റ്റ് സിഇഒ സത്യ നദെല്ല തുടങ്ങിയവർ രാജ്യത്തിന് നൽകിയ സംഭാവനകൾ വലുതാണെന്നും മറ്റ് രാജ്യങ്ങൾക്ക് ഇന്ത്യയിൽ നിന്ന് ഒട്ടനവധി കാര്യങ്ങൾ പഠിക്കാനുണ്ടെന്നും നിഷിയാമ വ്യക്തമാക്കി.
