തിരുവനന്തപുരം: ജീവനക്കാർക്ക് പുതിയ പാഠ്യ പദ്ധതിയുമായി തിരുവിതാംകൂർ ദേവസ്വം ബോർഡ്. ക്ഷേത്രങ്ങളിലേക്ക് കൂടുതൽ ഭക്തരെ ആകർഷിക്കുന്നതിനായുള്ള പരിശീലനം ജീവനക്കാർക്കായി നൽകി. ‘ഭക്തസുഖദം ക്ഷേത്രദർശനം 2024’ എന്ന പേരിലാണ് പരിപാടി സംഘടിപ്പിച്ചത്.
മുൻ ജില്ലാകളക്ടറും പ്രമുഖ ന്യൂമറോളജിസ്റ്റുമായ എം.നന്ദകുമാറിന്റെ നേതൃത്വത്തിലായിരുന്നു പരിശീലനം. വ്യത്യസ്ത ക്ഷേത്രങ്ങളിൽ പാലിക്കേണ്ട ആചാരമുറകളെ കുറിച്ച് ജീവനക്കാർ അറിഞ്ഞിരിക്കണമെന്നും അത് അതാത് ക്ഷേത്രങ്ങളിലെത്തുന്ന ഭക്തജനങ്ങൾക്ക് പകരണമെന്ന് ബോർഡ് പ്രസിഡന്റ് പി.എസ്. പ്രശാന്ത് പറഞ്ഞു. ക്ഷേത്രദർശനങ്ങൾ ഭക്തർക്ക് സുഖപ്രദമാക്കുക എന്ന ലക്ഷ്യത്തോടെ ക്ഷേത്രജീവനക്കാർ സേവനം ചെയ്യണമെന്നും അദ്ദേഹം കൂട്ടിച്ചേർത്തു.
തിരുവിതാംകൂർ ദേവസ്വം ബോർഡംഗം എ.അജികുമാർ അദ്ധ്യക്ഷത വഹിച്ചു.മലബാർ ദേവസ്വം ബോർഡ് പ്രസിഡന്റ് എം.ആർ.മുരളി മുഖ്യാതിഥിയായിരുന്നു. പരിശീലനം വരും ദിവസങ്ങളിലും തുടരുമെന്ന് ദേവസ്വം ബോർഡ് പ്രസിഡന്റ് അറിയിച്ചു.