കങ്കണ റണാവത്തിന് വേണ്ടി വോട്ടഭ്യർത്ഥിച്ച് പ്രധാനമന്ത്രി നരേന്ദ്രമോദി. ഹിമാചൽ പ്രദേശിലെ മാണ്ഡി മണ്ഡലത്തിലാണ് പ്രധാനമന്ത്രി എത്തിയത്. കങ്കണയുടെ തെരഞ്ഞെടുപ്പ് പ്രചാരണവുമായി ബന്ധപ്പെട്ട് സംഘടിപ്പിച്ച മഹാസമ്മേളനത്തെ നരേന്ദ്രമോദി അഭിസംബോധന ചെയ്തു. വേദിയിലെത്തിയ പ്രധാനമന്ത്രിയെ റോസാ പൂക്കൾ നൽകിയാണ് നടിയും മാണ്ഡി മണ്ഡലത്തിലെ ബിജെപി സ്ഥാനാർത്ഥിയുമായ കങ്കണ സ്വീകരിച്ചത്.
തനിക്ക് വേണ്ടി മാണ്ഡിയിലെ ജനങ്ങളെ കാണാനെത്തിയ പ്രധാനമന്ത്രിക്ക് കങ്കണ നന്ദിയും പറഞ്ഞു. “ബഹുമാനപ്പെട്ട പ്രധാനമന്ത്രി എന്നിൽ വിശ്വാസം അർപ്പിച്ച് മാണ്ഡിയിലെത്തി. അദ്ദേഹത്തിന്റെ മകൾക്ക് വോട്ട് ചെയ്യാൻ ജനങ്ങളോട് അഭ്യർത്ഥിച്ചു. അദ്ദേഹത്തിന്റെ ഹൃദയംഗമമായ വാക്കുകളും അചഞ്ചലമായ വിശ്വാസവും എന്നെ ആഴത്തിൽ സ്പർശിച്ചു”- കങ്കണ ട്വിറ്ററിൽ കുറിച്ചു. പ്രധാനമന്ത്രിക്കൊപ്പമുള്ള ചിത്രങ്ങളും കങ്കണ സമൂഹമാദ്ധ്യമങ്ങളിൽ പങ്കുവെച്ചു.