ന്യൂ ഡൽഹി: ബിജെപി സർക്കാരിന്റെ കാലാവധി ജൂൺ നാലിന് അവസാനിക്കുമെന്ന തൃണമൂൽ കോൺഗ്രസ് അധ്യക്ഷ മമത ബാനർജിയുടെ പരിഹാസത്തിന് മറുപടിയുമായി പ്രധാനമന്ത്രി നരേന്ദ്ര മോദി.മമത പറഞ്ഞത് സത്യമാണെന്നും ഈ സർക്കാരിന്റെ കാലാവധി എന്തായാലും ജൂൺ 4 ന് അവസാനിക്കുമെന്നും ആയിരുന്നു പ്രധാനമന്ത്രിയുടെ മറുപടി. തെരഞ്ഞെടുപ്പിന് ശേഷം ബിജെപി പുതിയ സർക്കാരായിരിക്കും രൂപീകരിക്കുകയെന്നും പ്രധാനമന്ത്രി കൂട്ടിച്ചേർത്തു.
” അവർ പറഞ്ഞത് സത്യമാണ്. ഈ സർക്കാർ എന്തായാലൂം ജൂൺ നാലിന് അവസാനിക്കും. അത് ഭരണഘടനപരമാണ്. അതിൽ രാഷ്ട്രീയമൊന്നുമില്ല. അപ്പോൾ പിന്നെ പുതിയ സർക്കാർ രൂപീകരിക്കണം, അല്ലേ? അത് ഞങ്ങൾ രൂപീകരിക്കുകയും ചെയ്യും” പ്രധാനമന്ത്രി പറഞ്ഞു. അതേസമയം പ്രതിപക്ഷത്തെ ശത്രുക്കളായി കാണുന്നില്ലെന്നും പ്രധാനമന്ത്രി പറഞ്ഞു.
“ഞാൻ ആരെയും വെല്ലുവിളിക്കുന്നില്ല. ഞാൻ അവരെയും ഒപ്പം കൂട്ടാൻ ആഗ്രഹിക്കുന്നു. ആരെയും വിലകുറച്ചും കാണുന്നില്ല. ഏകദേശം 60 -70 വർഷമായി സർക്കാർ രൂപീകരിച്ചവരാണ് അവർ . അവർ ചെയ്ത നല്ല കാര്യങ്ങളിൽ നിന്ന് എനിക്ക് പഠിക്കണം. പ്രതിപക്ഷത്തെ ശത്രുവായി കാണുന്നില്ല” പ്രധാനമന്ത്രി പറഞ്ഞു .
അതേസമയം പ്രതിപക്ഷത്തെ പരിചയസമ്പന്നരായ നേതാക്കളിൽ നിന്ന് ക്രിയാത്മകമായ വിമർശനങ്ങളും ഉപദേശങ്ങളും താൻ പ്രതീക്ഷിക്കുന്നുവെന്നും രാജ്യനന്മയ്ക്കായാണ് അവർ പറയുന്നതെങ്കിൽ അത് സ്വീകരിക്കാൻ താൻ തയ്യാറാണെന്നും പ്രധാനമന്ത്രി കൂട്ടിച്ചേർത്തു.