മഹീന്ദ്ര ഥാർ 5-ഡോർ 2024 ഓഗസ്റ്റ് 15-ന് പുറത്തിറക്കുമെന്ന് അറിയിച്ച് മഹീന്ദ്ര ഗ്രൂപ്പ് . അതേസമയം, മഹീന്ദ്ര ഡീലർഷിപ്പുകളിൽ പുതിയ ഥാറിനായി പ്രീ-ബുക്കിംഗ് സ്വീകരിച്ചു തുടങ്ങി. മാസം 4000 വാഹനങ്ങൾ നിർമിക്കാനാണ് മഹീന്ദ്രയുടെ പദ്ധതി. രാജ്യത്തിന്റെ വിവിധ സ്ഥലങ്ങളിൽ പരീക്ഷണയോട്ടം നടത്തുന്ന ഥാർ 5 ഡോർ മോഡൽ അർമദ എന്ന പേരിലായിരിക്കും വിൽക്കുക. ഡിസൈനിന്റെ കാര്യത്തിൽ, 3-ഡോർ മോഡലിൽ നിന്ന് വ്യത്യസ്തമായിരിക്കും പുതിയ ഥാർ.
10.25-ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെൻ്റ് സിസ്റ്റത്തോടുകൂടിയ പുനർരൂപകൽപ്പന ചെയ്‌ത ഡാഷ്‌ബോർഡ് ഇതിന് ഉണ്ടായിരിക്കും . ഉയർന്ന വേരിയൻ്റുകളിൽ 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ മാത്രമായിരിക്കും ഉണ്ടാവുക , താഴ്ന്ന വേരിയൻ്റുകളിൽ സ്കോർപിയോ എൻ പോലെയുള്ള വലിയ സെൻട്രൽ മൾട്ടി-ഇൻഫർമേഷൻ ഡിസ്‌പ്ലേ വന്നേക്കാം.
97 ബി എച്ച് പി വരെ കരുത്തും 300 എൻ എം ടോർക്കും സൃഷ്ടിക്കാനാവുന്ന 2.2 ലീറ്റർ എം ഹോക്ക് ഡീസൽ എൻജിനൊപ്പവും ആറു സ്പീഡ് മാനുവൽ, ആറു സ്പീഡ് ടോർക്ക് കൺവെർട്ടർ ഓട്ടമാറ്റിക് ഗീയർബോക്സുകൾ ലഭ്യമാണ്.
ലെതർ സീറ്റ് അപ്‌ഹോൾസ്റ്ററി, സിംഗിൾ-പേൻ സൺറൂഫ്, പുഷ് ബട്ടൺ സ്റ്റാർട്ട്, റിയർ എസി വെൻ്റുകൾ, 6 എയർബാഗുകളുടെ സുരക്ഷ, മുന്നിലും പിന്നിലും സെൻ്റർ ആംറെസ്റ്റ് തുടങ്ങിയ സവിശേഷതകൾ എസ്‌യുവിയിൽ ഉണ്ടാകും.5 വാതിലുകളുള്ള ഥാർ ഡ്രൈവർക്കും മുൻ യാത്രക്കാർക്കും വ്യക്തിഗത ആംറെസ്റ്റുകൾ വാഗ്ദാനം ചെയ്യും . ഇതിനുപുറമെ, ഇൻഫോടെയ്ൻമെൻ്റ് സിസ്റ്റത്തിനും ഇൻസ്ട്രുമെൻ്റ് ക്ലസ്റ്ററിനും വേണ്ടി കാറിൽ ഡ്യുവൽ ഫുൾ ഡിജിറ്റൽ സ്‌ക്രീൻ ഫംഗ്‌ഷൻ നൽകും. കാറിൽ ഡ്രം ബ്രേക്കിനു പകരം ഡിസ്‌ക് ബ്രേക്കുകൾ പിൻഭാഗത്ത് നൽകും. ഇതോടൊപ്പം, 360 ഡിഗ്രി ക്യാമറ, ഫ്രണ്ട് പാർക്കിംഗ് സെൻസർ, ഡാഷ്‌ക്യാം തുടങ്ങിയ സവിശേഷതകൾ 5-ഡോർ ഥാറിൽ കാണാം.
ഥാറിന്റെ മുൻ ബംബർ, പിൻ ബംബർ, ടെയിൽ ലാംപ് എന്നിവയിൽ മാറ്റം വരുത്തിയിട്ടുണ്ട്. അലോയ് വീലിന്റെ ഡിസൈനിനും മാറ്റങ്ങളുണ്ട്.ഥാറിന്റെ രൂപഭംഗി നിലനിർത്തി നീളം കൂട്ടിയെത്തുന്ന ഥാറിന്റെ പുതു മോഡൽ ആരാധകർ ഏറെ ആകാംക്ഷയോടെയാണ് കാത്തിരിക്കുന്ന വാഹനമാണ്.
