മലയാള സിനിമ അതിന്റെ ഏറ്റവും മികച്ച കാലത്തിലൂടെയാണ് കടന്നു പോകുന്നതെന്ന് നടൻ വിജയ് സേതുപതി. മലയാളത്തിൽ അടുത്തിടെ ഇറങ്ങിയ ഒട്ടുമിക്ക ചിത്രങ്ങളും താൻ കണ്ടെന്നും വിജയ് സേതുപതി പറഞ്ഞു. ഒരു അഭിമുഖത്തിനിടയിലാണ് താരം മലയാള സിനിമയെ പുകഴ്‌ത്തിയത്.
മലയാളത്തിൽ അടുത്തിടെ ഇറങ്ങിയ പ്രേമലു രണ്ടു തവണ കണ്ടു. വളരെ മനോഹരമായൊരു ചിത്രമാണ് പ്രേമലു. സിനിമയിലെ പ്രധാന കഥാപാത്രങ്ങൾ മാത്രമല്ല, എല്ലാവരും അത്ഭുതപ്പെടുത്തുന്ന പ്രകടനമാണ് കാഴ്ചവെച്ചതെന്നും നടൻ പറഞ്ഞു. പ്രേമലു മാത്രമല്ല, മമ്മൂട്ടി നായകനായെത്തിയ ഹൊറർ ഡ്രാമയായ ഭ്രമയുഗമടക്കം മലയാളത്തിൽ അടുത്തിടെയിറങ്ങിയ ഒട്ടുമിക്ക ചിത്രങ്ങളും കണ്ടു. മലയാള സിനിമ അതിന്റെ ഏറ്റവും മികച്ച സമയത്താണിപ്പോഴുള്ളതെന്നും അദ്ദേഹം കൂട്ടിച്ചേർത്തു.
12 കോടി രൂപ മുടക്കി 100 കോടി ക്ലബ്ബിലടക്കം ഇടം നേടിയ ഗിരീഷ് എ ഡി ചിത്രമാണ് പ്രേമലു. മലയാളത്തിന് പുറമെ തെലുങ്കിലും തമിഴിലും ചിത്രത്തിന് വലിയ സ്വീകാര്യതയാണ് സിനിമയ്‌ക്കു ലഭിച്ചത്. നസ്‌ലിന്‍, മമിത എന്നിവര്‍ കേന്ദ്രകഥാപാത്രങ്ങളെ അവതരിപ്പിച്ച പ്രേമലു ഒരു മുഴുനീള റൊമാന്റിക് കോമഡി എന്റര്‍ടൈനര്‍ ആയാണ് ഒരുക്കിയത്.
