സുരേഷ് ഗോപിയുമായി വളരെ അടുപ്പമുള്ള താര കുടുംബമാണ് നടൻ രതീഷിന്റേത്. സുരേഷ് ഗോപി തങ്ങളുടെ കുടുംബത്തിന് എങ്ങനെ താങ്ങും തണലായും നിന്നു എന്ന് പല വേദികളിലും രതീഷിന്റെ മകനും നടനുമായ പത്മരാജ് രതീഷ് പറഞ്ഞിട്ടുണ്ട്. ഗോകുൽ സുരേഷുമായും വളരെ സൗഹൃദത്തിലാണ് പത്മരാജ്. സുരേഷ് ഗോപിയുടെ തനിപ്പകർപ്പാണ് ഗോകുലെന്നും അതുകൊണ്ടുതന്നെ പല പ്രശ്നങ്ങളും നേരിടേണ്ടി വന്നിട്ടുണ്ടെന്നും താരം പറഞ്ഞു. ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് ഗോകുൽ സുരേഷുമായുള്ള സൗഹൃദത്തെ പറ്റി പത്മരാജ് രതീഷ് തുറന്നുപറഞ്ഞത്.
“കുട്ടിക്കാലത്ത് ഗോകുലുമായി വലിയ സൗഹൃദം ഒന്നും ഉണ്ടായിരുന്നില്ല. സുരേഷ് അങ്കിളിനെ വീട്ടിൽ പോയി കാണും, തിരികെ പോകും അത്രമാത്രം. തിരുവനന്തപുരത്തേക്ക് താമസം മാറിയതിന് ശേഷം ഗോകുലുമായി നല്ല സൗഹൃദത്തിലാണ്. അവന്റെ ഏറ്റവും പുതിയ മൂവി ഗഗനചാരി ഹിറ്റായതിൽ സന്തോഷമുണ്ട്. അവൻ അത്രയ്‌ക്ക് ആഗ്രഹിച്ചു ചെയ്ത സിനിമയാണത്. അതിലെ കഥാപാത്രത്തെ പറ്റി ഗോകുൽ ഒരുപാട് പറഞ്ഞിട്ടുണ്ട്. ഗോകുൽ നന്നായി ചെയ്തു എന്ന് കേട്ടപ്പോൾ വളരെ സന്തോഷം തോന്നി. അവൻ എൻ സഹോദരനാണ്”.
“പാവമാണ് ഗോകുൽ, ഒരു നിഷ്കളങ്കൻ. അതുകൊണ്ട് അവൻ പെട്ടെന്ന് റിയാക്ട് ചെയ്യും. സുരേഷ് ഗോപി അങ്കിളിന്റെ സ്വഭാവം തന്നെയാണ് ഗോകുലിനും. വളരെ സത്യസന്ധനാണ്. അവൻ പറയുന്നതിലും ചെയ്യുന്നതിലും എല്ലാം സത്യമുണ്ട്. കള്ളത്തരം ഒന്നും കാണിക്കാൻ അവന് അറിയില്ല. അതുകൊണ്ട് പല സ്ഥലങ്ങളിലും അവന് പ്രശ്നമുണ്ടായിട്ടുണ്ട്. കഷ്ടപ്പെടാൻ തയ്യാറുള്ള ആളാണ്. എന്നെക്കാൾ ചെറുപ്പമാണ് ഗോകുൽ. പക്ഷേ വളരെ പക്വതയുള്ള പെരുമാറ്റവും”-പത്മരാജ് രതീഷ് പറഞ്ഞു.
