തൃശ്ശൂർ: ജനസംഘം മുതൽ ബിജെപിയുടെ പുതിയ തലമുറ വരെയുള്ള നേതാക്കളുടെയും പ്രവർത്തകരുടെയും കഠിനാധ്വാനത്തെ പ്രശംസിച്ച് കേന്ദ്രമന്ത്രിയും തൃശൂർ എംപിയുമായ സുരേഷ് ഗോപി. തൃശ്ശൂരിലെ ബിജെപി പ്രവർത്തകരുടെ കരുത്താർന്ന പ്രകടനം അഭിനന്ദനാർഹമാണെന്നും മാതൃകയാക്കാവുന്നതാണെന്നും അദ്ദേഹം പ്രതികരിച്ചു. ബിജെപി പ്രവർത്തകർ ആദരവർഹിക്കുന്നുണ്ടെന്നും അദ്ദേഹം കൂട്ടിച്ചേർത്തു.
“തൃശ്ശൂരിലെ ബിജെപി പ്രവർത്തകരുടെ കരുത്താർന്ന പ്രവർത്തനം അഭിനന്ദനാർഹമാണ്. മുമ്പൊന്നും ഇല്ലാതിരുന്ന തരത്തിൽ വോട്ടർമാരുടെ മനമാറ്റത്തിന് അവർ ഒരു കാരണമായി. ഏകോപനം കൃത്യമായി നടത്തി ഒരു വോട്ട് പോലും പാഴാക്കാതെ എത്തിച്ചു എന്നതിൽ തൃശ്ശൂരിലെ ബിജെപി പ്രവർത്തകർക്ക് അഭിമാനിക്കാം. അവർ ആദരവ് അർഹിക്കുന്നു. എന്തൊക്കെ അനീഷിനോട് ആവശ്യപ്പെട്ടുവോ, അതെല്ലാം അദ്ദേഹം ചെയ്തു തന്നു”.
“വീട്ടിൽ പോലും പോകാൻ സമ്മതിക്കാതെ അനീഷിനെ ഞാൻ ഒരുപാട് ബുദ്ധിമുട്ടിച്ചിട്ടുണ്ട്. അതെല്ലാം ചിരിച്ചുകൊണ്ട് ഏറ്റുവാങ്ങി ഒരുപാട് നടുവൊടിഞ്ഞിട്ടുണ്ട് അനീഷും അദ്ദേഹത്തിനൊപ്പമുള്ള പ്രവർത്തകരും. ഇവരുടെ പ്രവർത്തനം അനുകരിക്കപ്പെടാൻ യോഗ്യമാണ്. ഭാസ്കർ റാവുജി, മാരാർജി, മുകുന്ദേട്ടൻ തുടങ്ങി ഇങ്ങറ്റത്തുള്ള മുരളീധരൻ വരെയുള്ളവരുടെ പ്രവർത്തനത്തിന്റെ ഫലം നമുക്ക് അനുഭവയോഗ്യമായി തുടങ്ങിയിരിക്കുന്നു”-സുരേഷ് ഗോപി പറഞ്ഞു.