ന്യൂഡൽഹി: ടീം ഇന്ത്യയുടെ ടി 20 ലോകകപ്പ് നേട്ടം ആഘോഷമാക്കുകയാണ് നാടും നഗരവും. വിജയത്തിന് പിന്നാലെ ആരാധകർ ദേശീയപതാകയുമായി നൃത്തംചവിട്ടി തെരുവിലിറങ്ങി. ആദ്യം ഡൽഹിയും മുംബൈയും പോലുളള പ്രധാന നഗരങ്ങളിലായിരുന്നുവെങ്കിൽ പിന്നീട് അത് രാജ്യമെങ്ങും പടർന്നുകയറി.
ഡൽഹി ഇന്ത്യാഗേറ്റിൽ ഉൾപ്പെടെ പതാക വീശി ജനങ്ങൾ ആനന്ദനൃത്തം ചവിട്ടുന്ന ദൃശ്യങ്ങൾ സമൂഹമാദ്ധ്യമങ്ങളിൽ വൈറലാണ്. മുംബൈ വിമാനത്താവളത്തിനുളളിൽ ടീം ഇന്ത്യയ്‌ക്ക് അഭിനന്ദനം നേർന്നുകൊണ്ടുളള ബാനറുമായിട്ടാണ് ആരാധകർ ആഘോഷിച്ചത്.
നൃത്തം ചവിട്ടിയും പാട്ടുപാടിയും വിമാനത്താവളത്തിലെത്തിയ യാത്രക്കാരും ജീവനക്കാരും ഒപ്പം ചേർന്നതോടെ ആഘോഷം ഉത്സവാന്തരീക്ഷത്തിലായി.
മഹാരാഷ്‌ട്ര, യുപി, നോയിഡ തുടങ്ങി രാജ്യത്തെ പ്രധാന കേന്ദ്രങ്ങളിലെല്ലാം ദേശഭക്തി മുദ്രാവാക്യങ്ങൾ മുഴക്കി ജനങ്ങൾ തെരുവിലിറങ്ങി. ദേശീയപതാകയും കൈയ്യിലേന്തി ഇന്ത്യൻ ടീമിന് ജയ് വിളിച്ചുളള ആഘോഷ ദൃശ്യങ്ങൾ ഇൻസ്റ്റഗ്രാമിലും എക്‌സിലും ഫേസ്ബുക്കിലും വൈറലാണ്.
ചിലയിടങ്ങളിൽ പടക്കം പൊട്ടിച്ചാണ് കിരീടനേട്ടം ആരാധകർ നാടിനെ അറിയിച്ചത്. അനിയന്ത്രിതമായി ആരാധകർ തടിച്ചുകൂടിയ ഇടങ്ങളിൽ സുരക്ഷയൊരുക്കാൻ പൊലീസും എത്തിയിരുന്നു.
