ഇന്ത്യ ലോകകപ്പ് നേടുന്നതിൽ നിർണായകമായത് സൂര്യകുമാറിന്റെ അവിസ്മരണീയ ക്യാച്ച് ആയിരുന്നുവെന്നതിൽ ആർക്കും തർക്കമില്ല. ക്രീസിൽ മില്ലർ, ജയിക്കാൻ ദക്ഷിണാഫ്രിക്കയ്ക്ക് വേണ്ടത് 16 റൺസ്. ഹാർദിക്കിനെ ആദ്യ പന്ത് മില്ലർ അടിച്ച് പറത്തിയതോടെ സിക്സർ എന്ന് എല്ലാവരും ഉറപ്പിച്ചു. എന്നാൽ ആ പന്ത് എത്തിയത് സൂര്യയുടെ കൈകളിലേക്കായിരുന്നു. അമ്പയർ റീപ്ലേയിൽ മില്ലർ പുറത്തായെന്ന് ഉറപ്പാക്കിയതോടെ വിവാദങ്ങളും പൊട്ടിപുറപ്പെട്ടു.
സൂര്യ ക്യാച്ചെടുക്കുമ്പോൾ ബൗണ്ടറി കുഷ്യൻ നീങ്ങിക്കിടക്കുന്നുവെന്നായിരുന്നു ഒരു വിഭാഗം പേരുടെ ആരോപണം. കുഷ്യനിൽ സൂര്യകുമാർ ചവിട്ടിയെന്നും പ്രചരണമുണ്ടായി. ഇന്ത്യൻ ടീമിനെ സഹായിക്കാൻ രണ്ടാം ഇന്നിംഗ്സിൽ ബൗണ്ടറി കുഷ്യൻ ബോധപൂർവം പുറത്തേക്ക് തള്ളിയതായി വരെ ആരോപണമുയർന്നിരുന്നു. പിന്നാലെ സമൂഹമാദ്ധ്യമങ്ങളിൽ സൂര്യയുടെ പറക്കും ക്യാച്ചിന്റെ സ്പൂഫ് വീഡിയോകളും ആരാധകർ പങ്കുവച്ചിരുന്നു. സംഭവം ബോളിവുഡ് സിനിമയായിരുന്നെങ്കിൽ അതിലെ സൂര്യകുമാറിന്റെ ക്യാച്ച് എങ്ങനെയാകുമെന്ന് അനുകരിച്ചിരിക്കുകയാണ് ഒരു ആരാധകൻ. ഈ വീഡിയോയ്ക്ക് സൂര്യകുമാർ നൽകിയ രസകരമായ മറുപടിയാണ് ഇപ്പോൾ വൈറൽ. നിങ്ങൾ കുറഞ്ഞ സമയത്തിനുള്ളിൽ മത്സരം പൂർത്തിയാക്കി. നന്ദിയെന്നാണ് സൂര്യ കമന്റായി കുറിച്ചത്.
View this post on Instagram
“>
ടി20 ലോകകപ്പ് നേടിയ ഇന്ത്യൻ ടീമിന്റെ വിക്ടറി പരേഡ് ഇന്നലെ മുംബൈയെ ഇളക്കിമറിച്ച് നടന്നിരുന്നു. വാങ്കഡെ സ്റ്റേഡിയത്തിൽ നടന്ന ബിസിസിഐയുടെ അനുമോദന ചടങ്ങിലും പതിനായിരങ്ങളാണ് പങ്കെടുത്തത്. രാവിലെ ഡൽഹി വിമാനത്താവളത്തിലെത്തിയ ഇന്ത്യൻ ടീമിന് ആവേശോജ്ജ്വലമായ സ്വീകരണമാണ് ഒരുക്കിയിരുന്നത്. പ്രധാനമന്ത്രി നരേന്ദ്ര മോദിയുടെ വസതിയിൽ ഒരുക്കിയ സ്വീകരണത്തിൽ പങ്കെടുത്തശേഷമാണ് താരങ്ങൾ മുംബൈയിലെത്തിയത്.
