കകമിഗഹാര: 44 വര്‍ഷത്തെ കാത്തിരിപ്പിന് വിരാമമിട്ട് ഏഷ്യന്‍ ഗെയിംസ് വനിതാ ഹോക്കിയില്‍ ഇന്ത്യയ്ക്ക് ചരിത്ര സ്വര്‍ണം. ഫൈനലില്‍ ആതിഥേയരായ ചൈനയെ 1-0ന് കീഴടക്കിയാണ് ഇന്ത്യന്‍ വനിതകള്‍ സ്വര്‍ണമണിഞ്ഞത്. ഈ നേട്ടത്തോടെ 2028ലെ ലോസ് ആഞ്ചലസ് ഒളിംപിക്സിനും ഇന്ത്യന്‍ വനിതാ ഹോക്കി ടീം യോഗ്യത നേടി. പത്താം മിനിറ്റിലായിരുന്നു ഇന്ത്യയുടെ വിജയഗോള്‍. ഉജ്ജ്വലമായ ടോമഹോക്ക് ഷോട്ടിലൂടെ ലാല്‍റെംസിയാമിയാണ് ഇന്ത്യയ്ക്ക് നിര്‍ണായക ലീഡ് സമ്മാനിച്ചത്. ഗോള്‍ വഴങ്ങിയതിന് പിന്നാലെ ചൈന ശക്തമായ ആക്രമണവുമായി തിരിച്ചെത്തിയെങ്കിലും ഇന്ത്യന്‍ പ്രതിരോധനിര ഉറച്ചുനിന്നു.
മത്സരത്തിനിടെ പരിചയസമ്പന്നയായ ഗോള്‍കീപ്പര്‍ സവിത പുനിയയുടെ പ്രകടനവും ഇന്ത്യയുടെ വിജയത്തില്‍ നിര്‍ണായകമായി. ചൈനയ്‌ക്ക് ലഭിച്ച പെനല്‍റ്റി സ്ട്രോക്ക് സവിത തടുത്തിട്ടതോടെ ഇന്ത്യയുടെ സ്വര്‍ണ പ്രതീക്ഷകള്‍ക്ക് കൂടുതല്‍ കരുത്തായി. ഏഷ്യന്‍ ഗെയിംസ് വനിതാ ഹോക്കിയില്‍ ഇന്ത്യ ഇതിന് മുന്‍പ് സ്വര്‍ണം നേടിയിരുന്നത് 1982ലായിരുന്നു. പിന്നീട് 1998ലും 2018ലും ഇന്ത്യ ഫൈനലില്‍ എത്തിയെങ്കിലും ഇരുതവണയും വെള്ളി മെഡലുമായി മടങ്ങേണ്ടിവന്നു.
ഇത്തവണ സെമിഫൈനലില്‍ ദക്ഷിണ കൊറിയയെ 2-0ന് പരാജയപ്പെടുത്തിയാണ് ഇന്ത്യ കലാശപ്പോരിന് യോഗ്യത നേടിയത്. ഫൈനലിലും പ്രതിരോധ മികവ് കൈവിടാതെ ചൈനയെ ഒരു ഗോളിന് പിന്നിലാക്കി നിര്‍ത്തുകയായിരുന്നു ഇന്ത്യന്‍ സംഘം. പാരിസ് ഒളിംപിക്സിലെ വെള്ളി മെഡല്‍ ജേതാക്കളായ ചൈനയ്‌ക്ക് ഇത്തവണയും ഫൈനലില്‍ പരാജയം നേരിട്ടതോടെ വെള്ളി മെഡലില്‍ തൃപ്തിപ്പെടേണ്ടിവന്നു. മൂന്നാം സ്ഥാനത്തിനായുള്ള മത്സരത്തില്‍ ദക്ഷിണ കൊറിയയെ ഷൂട്ടൗട്ടില്‍ 4-2ന് പരാജയപ്പെടുത്തി ജപ്പാന്‍ വെങ്കല മെഡല്‍ സ്വന്തമാക്കി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
44 വര്‍ഷത്തിന് ശേഷം ഏഷ്യന്‍ ഗെയിംസ് വനിതാ ഹോക്കിയില്‍ സ്വന്തമാക്കിയ ഈ സ്വര്‍ണം ഇന്ത്യന്‍ ടീമിന്റെ ചരിത്രത്തിലെ ശ്രദ്ധേയമായ നേട്ടമായി.
