മറ്റൊരു നാഴികക്കല്ല് കൂടി പിന്നിട്ട് ഇന്ത്യൻ റെയിൽവേ. രാമശ്വേരത്തെ പാമ്പൻ റെയിൽവേ കടൽപ്പാലത്തിൽ പരീക്ഷണയോട്ടം വിജയിച്ചു. ഓവർ ഹെഡ് എക്യുപ്‌മെൻ്റ് (OHE) വിജയകരമായി പരീക്ഷണയോട്ടം നടത്തി. രാമേശ്വരം സ്റ്റേഷൻ വരെയാണ് ട്രയൽ റൺ നടത്തിയത്.
പരീക്ഷയോട്ടത്തിന്റെ ദൃശ്യങ്ങൾ ഇന്ത്യൻ റെയിൽവേ എക്സിൽ പങ്കിട്ടിട്ടുണ്ട്. ഇന്ത്യയിലെ ആദ്യത്തെ വെർട്ടിക്കൽ ലിഫ്റ്റ് റെയിൽവേ കടൽപ്പാലത്തിൽ ടവർ കാറിന്റെ ട്രയൽ റൺ വിജയകരമായി പൂർത്തിയാക്കിയെന്നും പുതിയ പാമ്പൻ പാലം ഫിനിഷിംഗ് ലൈനിനോട് അടുക്കുന്നുവെന്നാണ് വീഡിയോ ദൃശ്യങ്ങൾ പങ്കുവച്ച് റെയിൽവേ മന്ത്രാലയം കുറിച്ചത്.
New Pamban Bridge nearing the finish line!
A successful trial run of tower car was recently conducted on India’s first vertical lift Railway sea bridge. pic.twitter.com/fKBgb6EXwE— Ministry of Railways (@RailMinIndia) August 5, 2024
എഞ്ചിനീയർമാരുടെയും സാങ്കേതിക വിദഗ്ധരുടെയും കഴിവിന്റെ തെളിവാണ് പാലമെന്നാണ് റെയിൽവേ മന്ത്രി അശ്വിനി വൈഷ്ണവ് എക്സിൽ കുറിച്ചത്.
The New Pamban Railway Bridge – a testament to the incredible capabilities of our engineers and technicians. pic.twitter.com/HfNTPcJ8sx
— Ashwini Vaishnaw (@AshwiniVaishnaw) August 6, 2024
സെപ്റ്റംബറിന് മുൻപായി പാലത്തിന്റെ നിർമാണ പ്രവർത്തനങ്ങൾ പൂർത്തിയാക്കുമെന്നും ഒക്ടോബർ ഒന്ന് മുതൽ രാമേശ്വരത്തേക്കുള്ള ട്രെയിൻ സർവീസ് പുനരാരംഭിക്കുമെന്നും റെയിൽവേ അധികൃതർ അറിയിച്ചു.
1913-ൽ നിർമ്മിച്ച പഴയ പാലം സുരക്ഷിതമല്ലെന്ന് പ്രഖ്യാപിച്ചതോടെ 2022 ഡിസംബർ 23-ന് മണ്ഡപത്തിനും രാമേശ്വരം ദ്വീപിനും ഇടയിലുള്ള ട്രെയിൻ ഗതാഗതം നിർത്തിവച്ചു. അമിതമായ ഘർ‌ഷണം അനുഭവപ്പെടുന്നുവെന്ന കണ്ടെത്തലിന് പിന്നാലെയാണ് പാമ്പൻ പാലത്തിലൂടെയുള്ള ട്രെയിൻ സർവീസ് നിർത്തിയത്.
2019-ലാണ് പുതിയ പാമ്പൻ പാലത്തിന്റെ പണി തുടങ്ങിയത്. പഴയ പാലത്തേക്കാൾ 30 മീറ്റർ ഉയരത്തിലാണ് പുതിയ പാലം പണിയുന്നത്. സമുദ്രനിരപ്പിൽ നിന്ന് 22 മീറ്റർ ഉയരത്തിൽ നാവിഗേഷൻ എയർ ക്ലിയറൻസ് നൽകാനുള്ള സംവിധാനമുണ്ടാകും. കഴി‍ഞ്ഞ ദിവസം 72.5 മീറ്റ വെർട്ടിക്കൽ ലിഫ്റ്റ് സ്പാൻ വിജയകരമായി പരീക്ഷിച്ചിരുന്നു. ബാക്കിയുള്ള നാല് ഗർഡറുകൾ സജ്ജമാക്കാനുള്ള ചുമതല റെയിൽ വികാസ് നിഗം ലിമിറ്റഡ് ഏറ്റെടുത്തു.
