ഡബ്ല്യൂസിസി അംഗങ്ങളെ തൊഴിലിടത്തിൽ നിന്നും മനപ്പൂർവ്വം മാറ്റിനിർത്തുന്നു എന്ന ആരോപണം നിഷേധിച്ച് സംവിധായകൻ ബി ഉണ്ണികൃഷ്ണൻ. ഡബ്ല്യുസിസി രൂപീകരിക്കുന്നതിന് മുൻപും അതിനുശേഷവും നടി പാർവ്വതി തിരുവോത്ത് അഭിനയിച്ച ചിത്രങ്ങളുടെ കണക്കുകളടക്കം പുറത്തുവിട്ടുകൊണ്ടാണ് വിഷയത്തിൽ ഉണ്ണികൃഷ്ണൻ പ്രതികരിച്ചത്. തങ്ങളുടെ ഭാഗത്തുനിന്ന് പലരും പാർവതിയെ സമീപിച്ചെങ്കിലും ശമ്പളത്തിന്റെയും കഥയുടെയും പേരിൽ നടി അതെല്ലാം വേണ്ടെന്നു വയ്ക്കുകയായിരുന്നുവെന്നും സംവിധായകൻ തുറന്നടിച്ചു.
“ഡബ്ല്യുസിസി അംഗങ്ങളെ തൊഴിലിൽ നിന്നും മാറ്റിനിർത്തുന്നു എന്ന പരാമർശം റിപ്പോർട്ടിലുണ്ട്. വളരെ ഗൗരവമായി ഞങ്ങൾ അത് പരിശോധിച്ചു. 21 യൂണിയനിലും ചർച്ച ചെയ്തു. ആരെങ്കിലും അങ്ങനെ ഒരു നിർദ്ദേശം കൊടുത്തോ എന്ന് പരിശോധിച്ചു. 2006-ൽ കരിയർ ആരംഭിച്ചത് മുതൽ 2018-ൽ ഡബ്ല്യുസിസി നിലവിൽ വരുന്നതുവരെ 11 സിനിമകളിലാണ് പാർവതി തിരുവോത്ത് അഭിനയിച്ചത്. ഈ സംഘടന നിലവിൽ വന്നതിനു ശേഷം 11 ചിത്രങ്ങളിൽ പാർവതി അഭിനയിച്ചിട്ടുണ്ട്. ഞങ്ങളുടെ കൂടെയുള്ള നിരവധി പേർ ഇവരെ വെച്ച് സിനിമ ചെയ്യാൻ സമീപിച്ചിരുന്നു. പക്ഷേ പലപ്പോഴും അവരെ കിട്ടിയിട്ടില്ല. ഇനി കിട്ടിയാൽ തന്നെ ആ കഥ ചെയ്യണമെന്ന് അവർക്ക് തോന്നണം”.
“ശമ്പളത്തിന്റെ പേരിൽ പാർവതി തിരുവോത്തുമൊത്തുള്ള ഒരുപാട് പ്രോജക്ടുകൾ നടക്കാതെ പോയിട്ടുണ്ട്. അതിന്റെ എല്ലാ വിവരങ്ങളും ഞങ്ങൾ ശേഖരിച്ചിട്ടുണ്ട്. ഡയറക്ടേഴ്സ് യൂണിയനിലെ എക്സിക്യൂട്ടീവ് കമ്മിറ്റി അംഗമാണ് സംവിധായകൻ സജിൻ ബാബു. അദ്ദേഹത്തിന്റെ റിലീസ് ചെയ്യാൻ പോകുന്ന സിനിമയിലെ നായിക റിമാ കല്ലിങ്കലാണ്. ഡബ്ല്യുസിസി അംഗങ്ങളെ മാറ്റി നിർത്തണമെന്ന നിലപാട് ഫെഫ്കയ്ക്ക് ഉണ്ടായിരുന്നുവെങ്കിൽ ഇത് സാധ്യമാകുമായിരുന്നോ”-ബി. ഉണ്ണികൃഷ്ണൻ പറഞ്ഞു.
