ബെംഗളൂരു: കർണാടക രാഷ്‌ട്രീയത്തിൽ പുതിയ വിവാദത്തിന് തിരികൊളുത്തി മുൻ മുഖ്യമന്ത്രി സിദ്ധരാമയ്യയുടേതെന്ന് അവകാശപ്പെട്ട് പ്രചരിക്കുന്ന ഒളിക്യാമറ ദൃശ്യങ്ങൾ. ദൃശ്യങ്ങൾ ഉപയോഗിച്ച് തന്നെ അപകീർത്തിപ്പെടുത്താൻ ശ്രമിക്കുന്നുവെന്ന് ചൂണ്ടിക്കാട്ടി സിദ്ധരാമയ്യ കോടതിയെ സമീപിച്ചു. വീഡിയോ പ്രസിദ്ധീകരിക്കുകയും പ്രചരിപ്പിക്കുകയും ചെയ്തെന്നാരോപിച്ച് 42 മാധ്യമ സ്ഥാപനങ്ങൾക്കും ഡിജിറ്റൽ പ്ലാറ്റ്‌ഫോമുകൾക്കുമെതിരെയാണ് ഹർജി നൽകിയിരിക്കുന്നത്.
ഹണിട്രാപ്പിന് സമാനമായ സാഹചര്യം സൂചിപ്പിക്കുന്ന ദൃശ്യങ്ങളാണ് സിദ്ധരാമയ്യയുടേതെന്ന പേരിൽ സമൂഹമാധ്യമങ്ങളിൽ പ്രചരിച്ചത്. ഒരു യൂട്യൂബ് ചാനലിലൂടെയാണ് വീഡിയോ ആദ്യം പുറത്തുവന്നതെന്നാണ് വിവരം. പിന്നീട് വിവിധ സമൂഹമാധ്യമ അക്കൗണ്ടുകളിലൂടെ ദൃശ്യങ്ങൾ വ്യാപകമായി പ്രചരിക്കുകയായിരുന്നു.
മുഖ്യമന്ത്രി പദം ലക്ഷ്യമിട്ടുള്ള ഡി. കെ ശിവകുമാറിന്റെ രാഷ്‌ട്രീയ നീക്കത്തിന്റെ ഭാഗമായാണ് വീഡിയോ എന്ന് കേന്ദ്രമന്ത്രി എച്ച്.ഡി. കുമാരസ്വാമി ആരോപിച്ചു. ഈ ദൃശ്യങ്ങൾ കാണിച്ച് ശിവകുമാർ അദ്ദേഹത്തെ ഭീഷണിപ്പെടുത്തിയെന്നും കുമാരസ്വാമി ആരോപിച്ചു.
അതേസമയം, മുഖ്യമന്ത്രി പദത്തിലെത്തിയശേഷം തന്നെ ഒളിക്യാമറ ദൃശ്യങ്ങളിൽ കുടുക്കാൻ ശ്രമം നടന്നിട്ടുണ്ടെന്നാണ് ഡി. കെ ശിവകുമാർ പറയുന്നത്. എന്തായാലും ഒളിക്യാമറാ വിവാദം കർണാടകയിലെ രാഷ്‌ട്രീയ പോരാട്ടത്തിന്റെ പുതിയ വേദിയായി മാറിയിട്ടുണ്ട്.
