മുംബൈ: വാർധയിൽ ദേശീയ ‘പിഎം വിശ്വകർമ്മ’ പരിപാടിയിൽ സംഘടിപ്പിച്ച പ്രദർശനങ്ങൾ സന്ദർശിച്ച് പ്രധാനമന്ത്രി നരേന്ദ്രമോദി. വിശ്വകർമ്മരുടെ ഉന്നമനം ലക്ഷ്യമിട്ട് തുടക്കം കുറിച്ച പദ്ധതിയാണ് പിഎം വിശ്വകർമ്മ. പിഎം വിശ്വകർമ്മയുടെ കീഴിൽ വർഷന്തോറും നിരവധി പരിപാടികൾ സംഘടിപ്പിക്കാറുണ്ട്.
പരിപാടിയിൽ വിശ്വകർമ്മ ഗുണഭോക്താക്കൾക്കുള്ള സർട്ടിഫിക്കറ്റുകളും വായ്പകളും പ്രധാനമന്ത്രി വിതരണം ചെയ്യുമെന്ന് പിഎംഒ അറിയിച്ചു. കരകൗശല തൊഴിലാളികൾ സമൂഹത്തിന് നൽകിയ സംഭവാനകൾക്കും അവരുടെ പൈതൃകത്തിനും ആദരസൂചകമായി സ്മാരക സ്റ്റാമ്പും പ്രധാനമന്ത്രി പുറത്തിറക്കും.
തുടർന്ന് മെഗാ ഇന്റഗ്രേറ്റഡ് ടെക്സ്റ്റൈൽ റീജിയണിനും അപ്പാരെൽ (പിഎം മിത്ര) പാർക്കിനും അമരാവതിയിൽ പ്രധാനമന്ത്രി തറക്കല്ലിടുമെന്നും പിഎംഒയുടെ ഓഫീസ് അറിയിച്ചു. ടെക്സ്റ്റൈൽ നിർമാണത്തിനും കയറ്റുമതിക്കുമായി ഇന്ത്യയെ ആഗോള ഹബ്ബാക്കി മാറ്റുകയെന്ന ലക്ഷ്യത്തോടെ തുടക്കം കുറിക്കുന്ന പദ്ധതിയാണ് പിഎം മിത്ര പാർക്കുകൾ.
മഹാരാഷ്ട്ര സർക്കാരിന്റെ ആചാര്യ ചാണക്യ നൈപുണ്യ വികസന കേന്ദ്രവും പ്രധാനമന്ത്രി ഇന്ന് ഉദ്ഘാടനം ചെയ്യും. സംസ്ഥാനത്തുടനീളമുള്ള 1,50,000 യുവാക്കൾക്ക് സൗജന്യ നൈപുണ്യ വികസന പരിശീലനമാണ് ഇതിലൂടെ സാധ്യമാക്കുന്നത്. സ്ത്രീ ശാക്തീകരണം ലക്ഷ്യമിട്ട് തുടക്കം കുറിച്ച പദ്ധതിയായ പുണ്യശ്ലോക് അഹല്യദേവി ഹോൾക്കർ വുമെൻ സ്റ്റാർട്ടപ്പ് സ്കീമും പ്രധാനമന്ത്രി ഉദ്ഘാടനം ചെയ്യും. പിന്നാക്ക വിഭാഗത്തിൽ ഉൾപ്പെടുന്ന സ്ത്രീകൾക്ക് സാമ്പത്തിക ഭദ്രത ഉറപ്പുവരുത്തുകയാണ് പദ്ധതിയുടെ ലക്ഷ്യം.
