ഹൈദരാബാദ് : തിരുപ്പതിയുമായി ബന്ധപ്പെട്ട വിവാദങ്ങളെ പറ്റി അഭിപ്രായ വോട്ടെടുപ്പ് നടത്തി വൈസിപി നേതാവും മുൻ മന്ത്രിയും , നടിയുമായ ആർകെ റോജയുടെ യൂട്യൂബ് ചാനൽ . ജഗൻ മോഹനെതിരെയുള്ള ഭക്തരുടെ വികാരപ്രകടനങ്ങളാണ് റോജയുടെ യൂട്യൂബ് ചാനലിൽ പ്രക്ഷേപണം ചെയ്തത് . അതുകൊണ്ട് തന്നെ പാർട്ടിയിലും ജഗനെതിരെ വിവാദങ്ങൾ ആളിക്കത്തുകയാണെന്നാണ് റിപ്പോർട്ട്.
തിരുപ്പതി ലഡ്ഡുവിൽ മായം ചേർക്കുന്നുവെന്ന ആരോപണത്തെക്കുറിച്ചുള്ള പൊതുജനവികാരം അറിയുകയാണ് ലക്ഷ്യമെന്നാണ് ചാനൽ വോട്ടെടുപ്പിന്റെ തുടക്കത്തിൽ വ്യക്തമാക്കുന്നത് . സർവേയിൽ പങ്കെടുത്തവരിൽ 74 ശതമാനവും മുൻ മുഖ്യമന്ത്രി വൈഎസ് ജഗൻ മോഹൻ റെഡ്ഡിയാണ് ലഡ്ഡുവിന്റെ പവിത്രത തകർത്ത് മായം ചേർക്കൽ പ്രശ്നത്തിന് കാരണമെന്ന് അഭിപ്രായപ്പെട്ടു.
തിരുമലയിലെ സർക്കാർ ഭരണത്തെ പറ്റിയും യൂട്യൂബ് ചാനൽ ജനങ്ങളോട് ചോദ്യങ്ങൾ ഉന്നയിക്കുന്നുണ്ട് . ആരുടെ ഭരണത്തിൻ കീഴിലാണ് ക്ഷേത്ര നഗരം മികച്ച രീതിയിൽ മുന്നോട്ട് പോയതെന്ന ചോദ്യത്തിന് ചന്ദ്രബാബു നായിഡുവിന്റെ ഭരണകാലത്താണ് തിരുപ്പതി അഭിവൃദ്ധി പ്രാപിച്ചതെന്നാണ് 77 ശതമാനം വോട്ടർമാരും പറഞ്ഞത് . വോട്ടെടുപ്പ് പൊതുജനങ്ങളുടെ അതൃപ്തി ഉയർത്തിക്കാട്ടുകയും ചെയ്യുന്നുണ്ട്.
