നവരാത്രി പൂജയ്‌ക്കായി നാടും നഗരവും ഒരുങ്ങിക്കഴിഞ്ഞു. ഇക്കുറിനവരാത്രി ആഘോഷം വരുന്നത് വിജയദശമി ഉൾപ്പെടെ ഒക്ടോബര് മൂന്നു മുതൽ 13 വരെയാണ് . ഒക്ടോബർ 2 മഹാലയ അമാവാസിയാണ്. ഒക്ടോബർ മൂന്നാണ് പ്രഥമ.
ദുര്‍ഗാദേവി മഹിഷാസുരനെ വധിച്ചതിന്റെ പ്രതീകമായി ആഘോഷിക്കുന്ന ഉത്സവമാണ് ദുര്‍ഗാപൂജ. നവരാത്രിപൂജ എന്നാല്‍ ഒമ്പതു രാത്രി നീണ്ടു നില്‍ക്കുന്ന പൂജ എന്നാണര്‍ത്ഥം. ഓരോ ദിവസവും പ്രത്യേകം പ്രത്യേകം പൂജ തന്നെ ആണ് അനുഷ്ഠിക്കുന്നത്. നവരാത്രിയുടെ ആദ്യ മൂന്നു ദിനം പാർവതീ ദേവിക്കും അടുത്ത മൂന്നു ദിനം ലക്ഷ്മീദേവിക്കും അവസാന മൂന്നു ദിനം സരസ്വതീദേവിക്കും പ്രാധാന്യം നൽകിവരുന്നു .അവസാനത്തെ മൂന്നു ദിവസങ്ങളിലുള്ള പൂജയാണ് ഏറ്റവും പ്രധാനം. അവസാന മൂന്നു ദിവസങ്ങളെ ദുര്‍ഗ്ഗാഷ്ടമി, മഹാനവമി, വിജയദശമി എന്നിങ്ങനെ ആണ് അറിയപ്പെടുന്നത്. ദുർഗ്ഗാഷ്ടമി നാളിൽ ദുർഗ്ഗയായും മഹാനവമി ദിനത്തിൽ ലക്ഷ്മിയായും വിജയദശമിയിൽ സരസ്വതിയായും ആരാധിക്കാറുണ്ട്.
വിദ്യാദേവതയായ സരസ്വതിക്ക് പ്രത്യേക പ്രാധാന്യമുള്ളത് കൊണ്ട് നവരാത്രിക്കാലത്ത് കൂടുതലും വിദ്യാർത്ഥികളാണ് വ്രതമെടുക്കുന്നത്. എന്നാൽ
ഏതു പ്രായത്തിലുള്ളവർക്കും ഒൻപതു ദിവസം നീണ്ടു നിൽക്കുന്ന ഈ വ്രതം അനുഷ്ഠിക്കാവുന്നതാണ്. സാധാരണയായി ഒൻപത് ദിവസം നീണ്ടു നിൽക്കുന്ന വ്രതമാണ് വേണ്ടത്. എങ്കിലും അത് സാധിക്കാത്തവർക്ക് 7, 5, 3, 1 എന്നീ ക്രമത്തിലും അനുഷ്ഠിക്കാവുന്നതാണ്.
എല്ലാ വ്രതങ്ങളും മനസ്സിനെയും ശരീരത്തെയും ശുദ്ധമാക്കാനുള്ളതാണ്. നവരാത്രി ദിനങ്ങളിൽ മത്സ്യ മാംസാദികൾ ഉപേക്ഷിക്കുക, ദേവീ ക്ഷേത്ര ദർശനം നടത്തുക, തുടങ്ങി സാധാരണ മറ്റുള്ള വ്രതങ്ങളുടെ രീതികൾ തന്നെ നവരാത്രിക്കും പിൻതുടരേണ്ടതാണ്. ഈ ദിവസങ്ങളിൽ സൂര്യോദയത്തിനു മുന്നേ ഉണരുകയും കുളിച്ചു നിലവിളക്കു കൊളുത്തി ദേവീ സ്തുതികൾ ജപിക്കുകയും വേണം. ലളിതാസഹസ്രനാമ ജപം , ദേവീ മാഹാത്മ്യം. ലളിതാ ത്രിശതി, എന്നിവ അത്യുത്തമം .
അരിഭക്ഷണം ഒരു നേരമായി ചുരുക്കുക എന്നത് സാർവ്വത്രികമാണ്. ഒൻപതു ദിവസവും ഏതെങ്കിലും ഒരു ദേവീക്ഷേത്രത്തിൽ കുളിച്ചു തൊഴുന്നതും നല്ലതാണ്. ദേവീപ്രീതിയിലൂടെ സർവ ഐശ്വര്യത്തിനു നവരാത്രി വ്രതം കാരണമാവും.
എല്ലാ ദിവസവും പ്രാത സന്ധ്യയിലും പ്രദോഷ സന്ധ്യയിലും സ്വഭവനത്തിൽ ഭദ്രദീപം തെളിയിക്കുകയും പ്രാർത്ഥന നടത്തുകയും ചെയ്യണം. ദുര്‍ഗ്ഗഷ്ടമി ദിനത്തിലാണ് പൂജ വെയ്‌ക്കുന്നത്. ഈ ദിവസത്തില്‍ പുസ്തകങ്ങളും ആയുധങ്ങളും പൂജ വെയ്‌ക്കുന്നു.
കര്‍മ്മ തടസ്സങ്ങള്‍ മാറാനും വിദ്യാപുരോഗതിക്കും ദേവിയുടെ അനുഗ്രഹം ലഭിക്കുമെന്നാണ് വിശ്വാസം.
