ചില ജീവികളെ കാണാൻ നിഷ്കളങ്കമാണ്. ആ ലിസ്റ്റിൽ പെടുത്താവുന്ന ഒന്നാണ് തേവാങ്ക്. പ്രൈമേറ്റ് (Primate) ഗോത്രത്തിലെ ലോറിസിനെ (Lorisinae) കുടുംബത്തിൽപ്പെടുന്ന സസ്തനി. മലേഷ്യ, ജാവ, സുമാത്ര, ബോർണിയൊ എന്നിവിടങ്ങളിലും ഇന്ത്യയിൽ അസം പോലുള്ള ചില സംസ്ഥാനങ്ങളിലും കുട്ടി തേവാങ്കുകൾ കാണപ്പെടുന്നു. ഉരുണ്ട തലയും വലിപ്പം കൂടിയ വൃത്താകൃതിയിലുള്ള കണ്ണുകളും. ഈ രൂപമാണ് തേവാങ്കിലേക്ക് നമ്മെ ആകർഷിക്കുന്നത്.
പൊതുവേ ‘ലോറിസ്’ എന്നറിയപ്പെടുന്ന തേവാങ്കുകളുടെ കൈകാലുകൾക്കും ആന്തരികാവയവങ്ങൾക്കും തലച്ചോറിനും ഘടനയിൽ മനുഷ്യരുടേതിനോടും കുരങ്ങുകളുടേതിനോടും സാദൃശ്യമുണ്ട്. ശരീരത്തിന് 30 സെന്റിമീറ്ററും വാലിന് അഞ്ച് സെന്റിമീറ്ററും നീളമുണ്ട്. 1.2 കി.ഗ്രാം വരെ തൂക്കവും. തലയിലും തോൾഭാഗത്തും വെളുത്തതോ ചാരനിറത്തിലുള്ളതോ ആയ രോമപാളികൾ. തലയിൽ നിന്നു പിന്നിലേക്കു പോകുന്ന തവിട്ടുനിറത്തിലുള്ള രേഖയും കണ്ണിനു ചുറ്റിലുമുള്ള തവിട്ടുവലയങ്ങളും ഇവയുടെ സവിശേഷതകളാണ്. തേവാങ്കുകളുടെ വയറിനും പൃഷ്ഠഭാഗത്തിനും വയ്ക്കോലിന്റെ നിറമായിരിക്കും. ഇവയുടെ മുൻ-പിൻ കാലുകൾക്ക് നീള വ്യത്യാസമുണ്ട്.
രൂപം കൊണ്ട് എന്ത് ക്യൂട്ട്. പക്ഷേ, തേവാങ്കുകളെ ഒന്ന് സൂക്ഷിക്കണം. കടിച്ചാൽ വിഷമാണ്. അവരുടെ കൈകളിലെ വിയർപ്പ് ഗ്രന്ഥി നക്കുന്നതിലൂടെ വിഷം ലഭിക്കും. ഉമിനീർ കലർത്തി വിഷം എടുക്കും. ഇതിന്റെ വിഷം വേട്ടക്കാരെ തുരത്തുകയും മനുഷ്യരിൽ അനാഫൈലക്റ്റിക് ഷോക്കും മരണവും വരെ ഉണ്ടാക്കുകയും ചെയ്യും. ഇവയുടെ വിഷ വിതരണ സംവിധാനം സവിശേഷമാണ്. ബ്രാച്ചിയൽ ഗ്രന്ഥി സ്ഥിതി ചെയ്യുന്നത് താരതമ്യേന രോമങ്ങളില്ലാത്തതും, മുകൾഭാഗത്തെ വളയുന്ന ഭാഗത്ത് ചെറുതായി ഉയർത്തിയതുമായ ഒരു ഭാഗത്താണ്. ഭീഷണി നേരിടുന്ന സമയം, ലോറിസ് അതിന്റെ ബ്രാച്ചിയൽ ഗ്രന്ഥി എക്സുഡേറ്റിനെ ഉമിനീരുമായി സംയോജിപ്പിക്കാൻ തലയ്ക്ക് മുകളിലൂടെ കൈകൾ ഉയർത്തും. പിന്നാലെ കടിക്കും.
സുരക്ഷയ്ക്കായി സ്വന്തം രോമത്തിലും ഈ വിഷം തേവാങ്ക് പുരട്ടി വയ്ക്കാറുണ്ട്. ലോകത്തിലെ ഒരേയൊരു വിഷമുള്ള പ്രൈമേറ്റുകളാണ് ഇവ. അതിനാൽ ഇവയെ ശല്യം ചെയ്യാതെ, സമ്പർക്കം പുലർത്താതെ ഇരിക്കണം. കാരണം, നിങ്ങൾക്കോ നിങ്ങളുടെ വീട്ടിലെ മറ്റ് വളർത്തുമൃഗങ്ങൾക്കോ ഗുരുതരമായ ദോഷം വരുത്താനുള്ള കഴിവുണ്ട് തേവാങ്കിന്. പലരും ഇവയെ വീട്ടിൽ വളർത്താറുണ്ട്. എന്നാൽ പലർക്കും കടിയേറ്റ് മരണംവരെ സംഭവിച്ചിട്ടുമുണ്ട്.
വളരെ സാവധാനത്തിൽ സഞ്ചരിക്കുന്നതിനാലാണ് തേവാങ്കുകളെ ‘സ്ളോ ലോറിസ്’ എന്നു വിളിക്കുന്നത്. ഓന്തുകൾ സഞ്ചരിക്കുന്നതുപോലെയാണ് ഇവ സഞ്ചരിക്കുക. അപൂർവമായി മാത്രമേ ഇവ നിലത്തിറങ്ങി സഞ്ചരിക്കാറുള്ളൂ. രാത്രികാലങ്ങളിൽ ഇരതേടാനിറങ്ങുന്ന തേവാങ്കുകൾ മണത്തറിഞ്ഞാണ് ഇരപിടിക്കുന്നത്. ചെറുജീവികളും പ്രാണികളും പഴവർഗങ്ങളുമാണ് ഇവയുടെ പ്രധാന ഭക്ഷണം.
