ഡെറാഡൂൺ : സംസ്ഥാനത്തുടനീളമുള്ള 416 മദ്രസകളിൽ സംസ്കൃതം നിർബന്ധിത വിഷയമാക്കാൻ പദ്ധതിയിട്ട് ഉത്തരാഖണ്ഡ് മദ്രസ വിദ്യാഭ്യാസ ബോർഡ് . ഇതിനായി പ്രത്യേക നിർദേശവും തയ്യാറാക്കിയിട്ടുണ്ട്.
പദ്ധതി നടപ്പിലാക്കുന്നതിനായി സംസ്ഥാന സംസ്കൃത വകുപ്പുമായി ധാരണാപത്രം (എംഒയു) ഒപ്പുവെക്കാനും ബോർഡ് ആലോചിക്കുന്നുണ്ട് . സംസ്കൃതത്തിനു പുറമേ, മദ്രസ വിദ്യാർത്ഥികൾക്കുള്ള അക്കാദമിക് പാഠ്യപദ്ധതി സമ്പന്നമാക്കുന്നതിന് കമ്പ്യൂട്ടർ പഠനവും ഉൾപ്പെടുത്തുന്നത് പരിഗണനയിലാണ്.
ബോർഡ് മദ്രസകളിൽ എൻസിഇആർടി സിലബസും അവതരിപ്പിച്ചു. ഈ വർഷം വിദ്യാർത്ഥികൾക്ക് 95 ശതമാനത്തിലധികം വിജയം ലഭിച്ചുവെന്ന് യുഎംഇബി ചെയർപേഴ്സൺ മുഫ്തി ഷാമൂൺ ഖാസ്മി പറഞ്ഞു.പാഠ്യപദ്ധതിയിൽ സംസ്കൃതം ചേർക്കുന്നത് അവരുടെ വിദ്യാഭ്യാസ വളർച്ചയെ ഗണ്യമായി സഹായിക്കുമെന്ന് അദ്ദേഹം പറഞ്ഞു.
സംസ്കൃത വകുപ്പിലെ ഉദ്യോഗസ്ഥരുമായി ഒന്നിലധികം മീറ്റിംഗുകൾ നടത്തിയിട്ടുണ്ടെന്നും ഉടൻ തന്നെ നല്ല പ്രതികരണം ലഭിക്കുമെന്ന വിശ്വാസത്തിലാണെന്നും ഖാസ്മി സൂചിപ്പിച്ചു. സർക്കാർ അനുമതി ലഭിച്ചാൽ, ഈ മദ്രസകൾ പുതിയ പാഠ്യപദ്ധതി നടപ്പിലാക്കുന്നതിനായി സംസ്കൃത അധ്യാപകരെ റിക്രൂട്ട് ചെയ്യാൻ തുടങ്ങും.
‘ നൂറിലധികം മദ്രസകളിൽ ഇതിനകം അറബിക് പഠിപ്പിക്കുന്നുണ്ട്, സംസ്കൃത ക്ലാസുകൾ ഉടൻ ആരംഭിക്കാൻ കഴിഞ്ഞാൽ അത് സന്തോഷകരമാണ്. മൗലവിമാരും പണ്ഡിറ്റുകളും പഠിപ്പിക്കുന്നത് ഞങ്ങളുടെ വിദ്യാർത്ഥികളെ നല്ല രീതിയിൽ വളർത്തുന്നതിൽ കാര്യമായി സഹായിക്കും‘- ഖാസ്മി പറഞ്ഞു. വിദ്യാർത്ഥികളിൽ ദേശീയതാബോധം വളർത്തിയെടുക്കാൻ വിമുക്തഭടന്മാരെ സമീപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
