ബീജിങ്: വിചിത്രമായ ആചാരത്തിന്റെപേരിൽ യുവാവിനെ പറ്റിച്ച് ലക്ഷങ്ങൾ കൈക്കലാക്കി കാമുകി. വിവാഹിതരാകാൻ തന്റെയും മുൻ ഭർത്താവിന്റെയും വിവാഹ കിടക്ക കത്തിക്കണമെന്ന് വിശ്വസിപ്പിച്ചാണ് യുവതി തട്ടിപ്പ് നടത്തിയത്. ചൈനയിലാണ് സംഭവം. 11.8 ലക്ഷം രൂപയാണ് കാമുകി യുവാവിൽ നിന്നും തട്ടിയെടുത്തത്.
തട്ടിപ്പിനിരയായ വാങ് എന്ന യുവാവ് ഡേറ്റിംഗ് പ്ലാറ്റ്‌ഫോമിലൂടെയാണ് കാമുകി ‘ലി’യെ കണ്ടുമുട്ടുന്നത്. ധനികയും അവിവാഹിതയുമായ സ്ത്രീയായി നടിച്ച അവർ വിശ്വാസ്യത നേടിയെടുക്കാൻ വാങ്ങിനെ നേരിട്ട് കാണുമ്പോൾ വിലപിടിപ്പുള്ള സമ്മാനങ്ങൾ നൽകാമെന്ന് വാഗ്ദാനം ചെയ്തു. കാര്യങ്ങൾ വിവാഹം വരെയെത്തിയപ്പോഴാണ് ഇവർ തന്ത്രപരമായി തട്ടിപ്പ് നടത്തിയത്.
തന്റെ മുൻ ഭർത്താവ് കുറച്ച് വർഷങ്ങൾക്ക് മുമ്പ് അസുഖം മൂലം മരിച്ചുവെന്നും വിവാഹിതരാകുന്നതിന് മുമ്പ് മുൻ പങ്കാളിക്ക് വേണ്ടി വിവാഹ കിടക്ക കത്തിക്കുന്ന ചടങ്ങ് നടത്തണമെന്നും ലി വാങിനോട് അഭ്യർത്ഥിച്ചു. ഇതിനായി വാങ് തനിക്ക് 100,000 യുവാൻ (11.8 ലക്ഷം രൂപ ) നൽകണമെന്നും അവർ ആവശ്യപ്പെട്ടു. ഇത് പ്രകാരം പണം ഓൺലൈനായി ട്രാൻസ്ഫർ ചെയ്ത് നൽകുകയായിരുന്നു.
യുവതി വാങിന് ചടങ്ങുകൾ നടക്കുന്നതിന്റെ വീഡിയോയും ഫോട്ടോകളും അയച്ചു നൽകി. എന്നാൽ കുറച്ച് സമയത്തിന് ശേഷം, ലി വാങ്ങിനെ സോഷ്യൽ മീഡിയ ആപ്പുകളിൽ ബ്ലോക്ക് ചെയ്യുകയും അക്കൗണ്ടുകൾ ഡിലീറ്റ് ചെയ്യുകയുമായിരുന്നു. താൻ കബളിപ്പിക്കപ്പെട്ടുവെന്ന് മനസ്സിലാക്കിയ വാങ് പൊലീസിൽ പരാതി നൽകി കാത്തിരിക്കുകയാണ് ഇപ്പോൾ.
