ജന്മദിനം ആഘോഷിച്ച് മണിക്കൂറുകൾക്ക് പിന്നാലെ യുവാവിന് ദാരുണാന്ത്യം.ബെംഗളൂരു ഇന്ത്യൻ ഇൻസ്റ്റിട്യൂട്ട് ഓഫ് മാനേജ്മെന്റിലെ പിജി വിദ്യാർത്ഥിയായ നിലായ് കൈലാഷ് ഭായ് പട്ടേലാണ് മരിച്ചത്. ഗുജറാത്ത് സൂറത്ത് സ്വദേശിയാണ്. ഹോസ്റ്റലിലെ രണ്ടാം നിലയിൽ നിന്നാണ് ഇയാൾ വീണത്.
മരണത്തിന് തൊട്ടുമുൻപ് കൂട്ടുകാർക്കൊപ്പം 29-ാം ജന്മദിനം കേക്ക് മുറിച്ച് ആഘോഷിച്ചിരുന്നു. ഇതിന് പിന്നാലെ മുറിയിൽ പോയ യുവാവിനെ ഇന്നലെ പുലർച്ച കോർട്ട് യാർഡിൽ വീണ് കിടക്കുന്ന നിലയിലാണ് കണ്ടത്. റൂമിൽ പോകുന്നതിനിടെ രണ്ടാം നിലയിലെ ബാൽക്കണിയിൽ നിന്ന് വീണതാകാമെന്നാണ് പ്രാഥമിക നിഗമനം.
പോസ്റ്റുമോർട്ടം റിപ്പോർട്ടിന് ശേഷമേ മരണത്തിന്റെ വ്യക്തമായ കാരണം പറയാനാകൂയെന്ന് പൊലീസ് പറഞ്ഞു. മൂന്ന് ദിവസം കഴിയുമ്പോൾ റിപ്പോർട്ട് ലഭിക്കും. സുരക്ഷ ഉദ്യോഗസ്ഥരാണ് ഇയാളെ ആശുപത്രിയിൽ എത്തിച്ചത്. എങ്കിലും ജീവൻ രക്ഷിക്കാനായില്ല. അസ്വഭാവിക മരണത്തിന് പൊലീസ് കേസ് രജിസ്റ്റർ ചെയ്തു.
