സ്കൂൾകാലത്തെ ഓർമകൾ പങ്കുവച്ച് രജനികാന്ത്. പഠനത്തിൽ താൻ മിടുക്കനായിരുന്നെന്നും എന്നാൽ പത്താം ക്ലാസ് വിജയിക്കുന്നതിൽ താൻ ഒരുപാട് വെല്ലുവിളികൾ നേരിട്ടുണ്ടെന്നും രജനികാന്ത് പറഞ്ഞു. താരം പഠിച്ച ബെംഗ്ളൂരുവിലെ ബസവനഗുഡി ആചാര്യ പാഠശാല സ്കൂളിന്റെ 90-ാം വാർഷികത്തോടനുബന്ധിച്ച് നടന്ന പൂർവ വിദ്യാർത്ഥി സംഗമത്തിലാണ് സ്കൂൾ ജീവിതത്തെ കുറിച്ച് രജനികാന്ത് ഓർത്തെടുത്തത്. ബാങ്കോക്കിൽ നിന്ന് വീഡിയോ സന്ദേശത്തിലായിരുന്നു താരത്തിന്റെ ഓർമപുതുക്കൽ.
“ഈ സ്കൂൾമുറ്റത്ത് നിന്നാണ് എന്റെ നടനജീവിതം ആരംഭിച്ചത്. ആചാര്യ സ്കൂളിൽ നാടകമത്സരത്തിൽ പങ്കെടുക്കുകയും വിജയിക്കുകയും ചെയ്തിട്ടുണ്ട്. ഗവിപുരയിലെ കന്നഡ മീഡിയം സ്കൂളിലായിരുന്നു പ്രാഥമിക വിദ്യാഭ്യാസം. അന്നാണ് പഠനത്തിൽ ഒന്നാമനായത്. പിന്നീട് എന്റെ സഹോദരൻ എന്നെ ഇംഗ്ലീഷ് മീഡിയം സ്കൂളായ ആചാര്യ പാഠശാലയിൽ ചേർത്തു. പക്ഷേ, ഇവിടെ വന്നപ്പോൾ ഭാഷ വലിയ പ്രശ്നമായിരുന്നു”.
“അദ്ധ്യാപകരുടെ സഹായത്തോടെയാണ് വെല്ലുവിളികളെ തരണം ചെയ്തത്. എട്ടും ഒമ്പതും ക്ലാസുകൾ വിജയിച്ചു. പക്ഷേ, ഫിസിക്സും കെമിസ്ട്രിയും കണക്കും മോശമായതിനാൽ പത്തം ക്ലാസിൽ വിജയിക്കാനായില്ല. കെമിസ്ട്രി അദ്ധ്യാപകൻ സൗജന്യമായി ക്ലാസെടുത്തുതന്നു. അങ്ങനെയാണ് പത്താം ക്ലാസ് വിജയിച്ചതെന്നും” രജനികാന്ത് പറഞ്ഞു.
