സംസ്ഥാനത്തെ സ്വർണവില വീണ്ടും സർവകാല റെക്കോർഡിൽ. ഇന്ന് പവന് 160 രൂപ കൂടിയതോടെയാണ് സ്വർണവില റെക്കോർഡുകൾ ഭേദിച്ച് പുതിയ ഉയരം കുറിച്ചത്. ഇതോടെ ഒരു പവൻ സ്വർണത്തിന്റെ വില 64,600 രൂപയായി. ഗ്രാമിന് 20 രൂപയും വർദ്ധിച്ചു. ഇതോടെ ഒരു ഗ്രാം സ്വർണത്തിന് 8075 രൂപയാണ് വില.
11 നായിരുന്നു ഇതിനുമുൻപ് സ്വർണം റെക്കോർഡ് വിലയിലെത്തിയത്. 64,480 ആയിരുന്നു അന്നത്തെ വില, ഇതാണ് പഴങ്കഥയായത്. ഇങ്ങനെപോയാൽ വരും ദിവസങ്ങളിൽ വില 65,000 കടന്നേക്കുമെന്നാണ് സൂചന. കഴിഞ്ഞ മാസം 22 ന് 60,000 കടന്ന പവൻ വില ദിവസങ്ങൾക്കുള്ളിൽ 64,000 ൽ എത്തുകയായിരുന്നു.
രാജ്യാന്തര വിപണിയിലെ മാറ്റങ്ങളാണ് സ്വർണവിലയിൽ പ്രതിഫലിക്കുന്നത്. അമേരിക്കയിൽ ഡൊണാൾഡ് ട്രംപ് അധികാരമേറ്റതിനുപിന്നാലെ ധനവിപണിയിലുണ്ടായ അനിശ്ചിതത്വങ്ങളും ഓഹരി വിപണിയിലുണ്ടായ ചലനങ്ങളും സ്വർണവിലയെ സ്വാധീനിച്ചിട്ടുണ്ട്.
