മലപ്പുറം: യുവതിയെ പ്രണയം നടിച്ച് വിവാഹ വാഗ്ദാനം നൽകി പീഡിപ്പിച്ച വ്ളോഗർ അറസ്റ്റിൽ. വഴിക്കടവ് സ്വദേശി ചോയ്തല വീട്ടിൽ ജുനൈദിനെയാണ് മലപ്പുറം പൊലീസ് ബെംഗളൂരുവിൽ നിന്നും അറസ്റ്റ് ചെയ്തത്.
യുവതിയെ സോഷ്യൽമീഡിയ വഴിയാണ് പ്രതി പരിചയപ്പെട്ടത്. തുടർന്ന് ഇരുവരും പ്രണയത്തിലായി. വിവാഹം ചെയ്യാമെന്ന് യുവതിക്ക് വാഗ്ദാനം നൽകുകയും ചെയ്തിരുന്നു. ശേഷം രണ്ട് വർഷത്തോളം ബന്ധം തുടർന്നു. മലപ്പുറത്തും പരിസര പ്രദേശങ്ങളിലെ വിവിധ ലോഡ്ജുകളിലും ഹോട്ടലുകളിലുമെത്തിച്ച് യുവതിയെ ഇയാൾ പീഡിപ്പിച്ചു. ഇതിനിടെ നഗ്നഫോട്ടോകൾ പകർത്തുകയും ചെയ്തു.
പിന്നീട് ഈ നഗ്നഫോട്ടോകൾ കാണിച്ച് യുവാവ് ഭീഷണിപ്പെടുത്തി. സോഷ്യൽമീഡിയ വഴി പുറത്തുവിടുമെന്ന് പറഞ്ഞായിരുന്നു ഭീഷണി. ഇതിന് പിന്നാലെ യുവതി പൊലീസിനെ സമീപിക്കുകയായിരുന്നു.
