പത്തനംതിട്ട: റവന്യൂ റിക്കവറി കുടിശ്ശികയായ കെട്ടിടനികുതി പിരിച്ചെടുക്കാൻ ശ്രമിച്ച നാരങ്ങാനം വില്ലേജ് ഓഫീസറെ ഓഫീസിനുള്ളിൽ കയറി വെട്ടുമെന്ന് ഭീഷണിപ്പെടുത്തിയ സിപിഎം നേതാവിനെതിരെ നിയമ നടപടി സ്വീകരിക്കണമെന്ന് എൻ. ജി. ഒ. സംഘ് ആവശ്യപ്പെട്ടു.
ഭരണാനുകൂല രാഷ്ട്രീയ നേതാക്കളുടെ ഭീഷണി മൂലം ജീവനക്കാർക്ക് സമാധാനപരമായി ജോലി ചെയ്യാനുള്ള സാഹചര്യം സംസ്ഥാനത്ത് നഷ്ടപ്പെട്ടിരിക്കുകയാണ്. സാമ്പത്തിക വർഷാവസാനത്തെ ഊർജ്ജിത പിരിവിന്റെ ഭാഗമായി കുടിശ്ശിക പിരിച്ചെടുക്കാൻ സർക്കാർ ചുമതലപ്പെടുത്തിയ ഉദ്യോഗസ്ഥർക്ക് മതിയായ സുരക്ഷ ഒരുക്കാൻ സർക്കാർ തയ്യാറാകണമെന്നും കേരള എൻ. ജി. ഒ. സംഘ് ജില്ലാ പ്രസിഡന്റ് എൻ. ജി. ഹരീന്ദ്രൻ, ജില്ലാ സെക്രട്ടറി എം. രാജേഷ് എന്നിവർ ആവശ്യപ്പെട്ടു.
