വയനാട്: കൽപ്പറ്റ പൊലീസ് സ്റ്റേഷനിൽ യുവാവ് തൂങ്ങി മരിച്ച നിലയിൽ. അമ്പലവയൽ സ്വദേശി ഗോകുലിനെ (18 ) യാണ് സ്റ്റേഷനിലെ ശുചിമുറിയിൽ തൂങ്ങിമരിച്ച നിലയിൽ കണ്ടെത്തിയത്. ഒരുപെൺകുട്ടിയെ കാണാതായതുമായി ബന്ധപ്പെട്ട് യുവാവിനെ സ്റ്റേഷനിലേക്ക് വിളിച്ച് വരുത്തിയിരുന്നു.
കഴിഞ്ഞ മാസം 26 പ്രായപൂർത്തിയാകാത്ത ഒരു പെൺകുട്ടിയെ കാണാതായിരുന്നു. ഇതുമായി ബന്ധപ്പെട്ട പൊലീസ് അന്വേഷണം നടക്കുന്നതിനിടെ കോഴിക്കോടുനിന്നും ഗോകുലിനൊപ്പം പെൺകുട്ടിയെ കണ്ടെത്തി. ഇരുവരെയും പൊലീസ് സ്റ്റേഷനിൽ വിളിച്ചുവരുത്തിയിരുന്നു. പെൺകുട്ടിയെ വീട്ടുകാർക്കൊപ്പം അയക്കുകയും യുവാവിനെ സ്റ്റേഷനിൽ തന്നെ നിർത്തുകയും ചെയ്തു.
പൊലീസുകാരോട് അനുമതി വാങ്ങി ശുചിമുറിയിൽ പോയ ഗോകുൽ ഏറെ നേരമായിട്ടും മടങ്ങി വന്നില്ല. ഇതിനെത്തുടർന്ന് പോലീസുകാരെത്തി പരിശോധിച്ചപ്പോഴാണ് ശുചിമുറിക്കുള്ളിൽ തൂങ്ങിമരിച്ച നിലയിൽ കണ്ടെത്തിയത്. മൃതദേഹം കൽപ്പറ്റയിലെ സ്വകാര്യ ആശുപത്രിയിലേക്ക് മാറ്റി. ഡിവൈഎസ്പിയും എസ്പിയും ഉൾപ്പെടെയുള്ളവർ സ്റ്റേഷനിലെത്തി പരിശോധന നടത്തുകയാണ്.
