ഗാന്ധിനഗർ: ഭീകരത ആയുധമാക്കി പാകിസ്താൻ ഇന്ത്യക്കെതിരെ യുദ്ധം നടത്തുകയാണെന്ന് പ്രധാനമന്ത്രി നരേന്ദ്രമോദി. ഇന്ത്യയിൽ നിന്ന് ഭീകരരെ പൂർണമായും തുടച്ചുനീക്കുമെന്ന് പ്രധാനമന്ത്രി പറഞ്ഞു. ഗാന്ധിനഗറിൽ സംഘടിപ്പിച്ച പൊതുറാലിയെ അഭിസംബോധന ചെയ്യുകയായിരുന്നു അദ്ദേഹം.
“കഴിഞ്ഞ 25 വർഷമായി വിനോദസഞ്ചാരികളെയും തീർത്ഥാടകരെയും സാധാരണക്കാരെയും ലക്ഷ്യമിട്ട് പാകിസ്താൻ ആക്രമണം നടത്തുന്നു. നമ്മൾ ഇത് സഹിക്കണോ വേണ്ടയോയെന്ന് ജനങ്ങൾ പറയൂ. ഭാരതം സമാധാനത്തിലാണ് വിശ്വസിക്കുന്നത്. എന്നാൽ ആവർത്തിച്ചുള്ള പ്രകോപനകരമായ ആക്രമണങ്ങൾ നടത്തുമ്പോൾ തിരിച്ചടിക്കാൻ ഇന്ത്യ മടിക്കില്ല”.
പാകിസ്താനിലെ ജനങ്ങളോട് എനിക്ക് ഒന്ന് മാത്രമാണ് ചോദിക്കാനുള്ളത്. ഭീകരവാദം കൊണ്ട് നിങ്ങൾക്ക് എന്താണ് ലഭിച്ചത്. പാകിസ്താനെ ഭീകരതയിൽ നിന്ന് മോചിപ്പിക്കണം. സമാധാനത്തോടെ ജീവിക്കുക എന്നാൽ മാത്രമേ സമാധാനത്തോടെ ആഹാരം കഴിക്കാൻ സാധിക്കകയുള്ളൂവെന്നും പ്രധാനമന്ത്രി പറഞ്ഞു.
