ന്യൂഡൽഹി: ലോക പരിസ്ഥിതി ദിനത്തോടനുബന്ധിച്ച് വൃക്ഷത്തൈ നട്ട് പ്രധാനമന്ത്രി നരേന്ദ്രമോദി. ഡൽഹിയിലെ മഹാവീർ ജയന്തി പാർക്കിലാണ് വൃക്ഷത്തൈ നട്ടത്. ഭൂമിയെ സംരക്ഷിക്കേണ്ട ഉത്തരവാദിത്തം രാജ്യത്തെ മുഴുവൻ പൗരന്മാർക്കും ഉണ്ടാകണമെന്ന് പ്രധാനമന്ത്രി ഓർമിപ്പിച്ചു.
“ലോകപരിസ്ഥിതി ദിനത്തിൽ, നമ്മുടെ ഗ്രഹത്തെ സംരക്ഷിക്കുന്നതിനും നാം നേരിടുന്ന വെല്ലുവിളികളെ അതിജീവിക്കുന്നതിനുമുള്ള ശ്രമങ്ങൾ കൂടുതൽ ശക്തമാക്കേണ്ടതുണ്ട്. പരിസ്ഥിതിയെ ഹരിതാഭവും മനോഹരവുമാക്കുന്നതിനായി പ്രവർത്തിക്കുന്ന എല്ലാവരെയും അഭിനന്ദിക്കുന്നു”- പ്രധാനമന്ത്രി എക്സിൽ കുറിച്ചു.
ലോകപരിസ്ഥിതി ദിനത്തോടനുബന്ധിച്ച് രാജ്യത്തുടനീളം നടക്കുന്ന ആഘോഷങ്ങളുടെ ഭാഗമായാണ് പ്രധാനമന്ത്രി വൃക്ഷതൈ നട്ടത്. എല്ലാ പരിസ്ഥിതി ദിനത്തിലും പ്രകൃതിയെ സംരക്ഷിക്കേണ്ട ഉത്തരവാദിത്തം ഓർമിപ്പിച്ചുകൊണ്ട് പ്രധാനമന്ത്രി തൈ നടും. ഇത്തവണ ഡൽഹിയിൽ 200 ഇലക്ട്രിക് ബസുകൾ കൂടി അദ്ദേഹം ഫ്ലാഗ് ഓഫ് ചെയ്തു.
പരിസ്ഥിതിയെ സംരക്ഷിക്കുന്നതിനുള്ള രാജ്യത്തിന്റെ പ്രതിബന്ധതയെ എടുത്തുകാട്ടുന്ന ‘ഏക് പെഡ് മാ കേ നാം പർ’ എന്ന സംരംഭത്തിന്റെ വാർഷികം ആഘോഷകൂടിയാണിത്. ജൂൺ അഞ്ചിനും സെപ്റ്റംബർ 30-നും ഇടയിൽ രാജ്യത്തുടനീളം 10 കോടി മരങ്ങൾ നടുക എന്നതാണ് പദ്ധതിയുടെ ലക്ഷ്യം.