തിരുവനന്തപുരം : വിദ്യാലയങ്ങളിലെ സൂംബ ഡാൻസ് വിഷയത്തിൽ വിദ്യാഭ്യാസ മേഖലയിലെ പരിഷ്കാരങ്ങൾ തീരുമാനിക്കേണ്ടത് മതസംഘടനകളല്ല എന്നും മത സംഘടനകളുടെ അഭിപ്രായത്തിനനുസരച്ച് വിദ്യാഭ്യാസ മന്ത്രി യു ടേൺ അടിക്കരുതെന്നും എബിവിപി സംസ്ഥാന സെക്രട്ടറി ഈ യു ഈശ്വരപ്രസാദ്. ലഹരിക്കെതിരെയുള്ള ക്യാമ്പയിന്റെ ഭാഗമായി നടന്ന യോഗത്തിൽ മുഖ്യമന്ത്രി ഈ ആശയം ഉന്നയിച്ചപ്പോൾ വിദ്യാഭ്യാസ മേഖലയിലെ മുഴുവൻ സംഘടനകളും അംഗീകരിച്ചതാണ്.
കേരളത്തിൽ ഈ സർക്കാരിന്റെ സമയത്ത് പല വിഷയങ്ങളിൽ ചില മത സംഘടനകൾ അഭിപ്രായം പറയുമ്പോൾ വോട്ട് ബാങ്കിന് വേണ്ടി സർക്കാർ തീരുമാനങ്ങളിൽ നിന്നും യു ടേൺ അടിക്കുന്നത് നാം കണ്ടിട്ടുണ്ട്. രാഷ്ട്രീയത്തിനപ്പുറം വിദ്യാഭ്യാസമേഖലയിൽ കാലാനുസൃതമായ പരിഷ്കാരം നടത്തുവാൻ സർക്കാർ തയ്യാറാകണം. മതസംഘടനകൾ തങ്ങളുടെ ഇങ്കിതം വിദ്യാഭ്യാസമേഖയിൽ നടത്തുവാൻ ശ്രമിക്കരുത്. മതപാഠശാലയല്ല സ്കൂളുകൾ എന്ന് അത്തരക്കാർ മനസ്സിലാക്കണം.
നിലവിൽ വിദ്യാഭ്യാസ വകുപ്പ് സൂംബ ഡാൻസ് വിദ്യാലയങ്ങളിൽ നടപ്പിലാക്കുന്ന തീരുമാനത്തിൽ ഉറച്ചുനിൽക്കുന്നത് സ്വാഗതം ചെയ്യുന്നുവെന്നും അദ്ദേഹം പറഞ്ഞു.
