കുവൈറ്റ് സിറ്റി: പ്രവാസികൾക്ക് സൗജന്യ നിയമോപദേശം നൽകുന്ന പ്രവാസി ലീഗൽ സെൽ കുവൈറ്റ് ചാപ്റ്റർ, കുവൈറ്റിലെ പ്രശസ്ത അഭിഭാഷക സ്ഥാപനമായ അൽ ദോസ്തൗർ ലോ ഗ്രൂപ്പുമായി ധാരണാപത്രം ഒപ്പുവച്ചു.
ചടങ്ങിൽ ലോ ഗ്രൂപ്പിനെ പ്രതിനിധീകരിച്ച് പ്രമുഖ കുവൈറ്റി അഭിഭാഷകൻ ഡോ. തലാൽ താക്കി, പ്രവാസി ലീഗൽ സെൽ കുവൈറ്റ് കൺട്രി ഹെഡ് ബാബു ഫ്രാൻസിസ്, പ്രസിഡണ്ട് ബിജു സ്റ്റീഫൻ എന്നിവർ പങ്കെടുത്തു.
2019 ഡിസംബറിൽ പ്രവർത്തനം ആരംഭിച്ച പ്രവാസി ലീഗൽ സെൽ കുവൈറ്റ് ചാപ്റ്റർ, ഇന്ത്യക്കാരായ പ്രവാസികൾക്ക് ഫീസില്ലാതെ നിയമോപദേശം നൽകിക്കൊണ്ടിരിക്കുകയാണ്. പുതിയ ധാരണാപത്രം പ്രകാരം, കൂടുതൽ കുവൈറ്റി അഭിഭാഷകരുടെ സേവനങ്ങളും ഉപദേശങ്ങളും പ്രവാസികൾക്ക് വേഗത്തിൽ ലഭ്യമാകും.
കോവിഡ് കാലഘട്ടത്തിൽ പ്രവാസികളുടെ നാട്ടിലേക്കുള്ള മടക്ക യാത്ര, റദ്ദാക്കിയ ടിക്കറ്റുകളുടെ തുക തിരികെ ലഭിക്കൽ, പൊതുമാപ്പ് പ്രയോജനപ്പെടുത്തിയ ഇന്ത്യക്കാരുടെ നാട്ടിലേക്കുള്ള യാത്ര, മരണപ്പെട്ട പ്രവാസികളുടെ മൃതദേഹങ്ങൾ നാട്ടിലെത്തിക്കൽ, ഗർഭിണി സ്ത്രീകളുടെ മടക്കം തുടങ്ങി വിവിധ വിഷയങ്ങളിൽ സുപ്രീം കോടതിയിലും ഹൈക്കോടതികളിലും പ്രവാസി ലീഗൽ സെൽ ഹർജികൾ സമർപ്പിച്ചിരുന്നു.
വിദേശപഠനത്തിനായി പോകുന്ന ഇന്ത്യൻ വിദ്യാർത്ഥികൾക്ക് നിയമ സംരക്ഷണം നൽകണമെന്ന് ആവശ്യപ്പെട്ടുള്ള ഡൽഹി ഹൈക്കോടതി വിധിയും, തൊഴിൽ തട്ടിപ്പുകൾ തടയാൻ സമർപ്പിച്ച ഹർജിയുടെ അടിസ്ഥാനത്തിൽ കേരളാ സർക്കാരിന്റെ സ്‌പെഷ്യൽ ടാസ്ക് ഫോഴ്സ് രൂപീകരണവും, പ്രവാസികളുടെ ക്ഷേമനിധി അംഗത്വവുമായി ബന്ധപ്പെട്ട കേസുകളിലെ അനുകൂല വിധികളും ലീഗൽ സെല്ലിന്റെ പ്രവർത്തനങ്ങൾക്ക് വലിയ അംഗീകാരം നേടി.
കഴിഞ്ഞ അഞ്ച് വർഷങ്ങളിലായി കുവൈറ്റിലെ നിരവധി പ്രവാസികൾക്ക് സൗജന്യ നിയമസഹായം ലഭിച്ചതോടൊപ്പം, ഇന്ത്യയിലും ലീഗൽ സെല്ലിന്റെ കീഴിൽ നിയമോപദേശം ലഭ്യമാക്കപ്പെടുന്നുണ്ട്.
സേവനങ്ങൾക്കായി ബന്ധപ്പെടേണ്ട നമ്പറുകൾ:
📞 +965 41105354, 📞 +965 97405211
📧 pravasilegalcellkuwait@gmail.com
