കുവൈറ്റ് സിറ്റി : “ഒന്നിച്ചുണ്ണാം തിരുവോണം ഇടുക്കിയോടൊപ്പം” എന്ന തലക്കെട്ടിൽ ഇടുക്കി അസോസിയേഷൻ കുവൈറ്റ് (ഐഎകെ) ആഭിമുഖ്യത്തിൽ സുംരുദയ പാലസ് ഹാളിൽ സംഘടിപ്പിച്ച ഓണാഘോഷം, കേരളത്തിന്റെ ഐക്യവും സാംസ്കാരിക പൈതൃകവും വിളിച്ചോതുന്ന ഭംഗിയാർന്ന വേദിയായി. ഐഎകെ ജനറൽ സെക്രട്ടറി ജോമോൻ പി. ജേക്കബ് സ്വീകരണം നടത്തിയ ചടങ്ങ്, കുവൈറ്റിലെ സാമൂഹിക പ്രവർത്തക ഹദീൽ അൽ ബുക്രൈസ് ഔദ്യോഗികമായി ഉദ്ഘാടനം ചെയ്തു.
തുടർന്ന് ഐഎകെ പ്രസിഡന്റ് ബിനു ആഗ്നൽ ജോസ് സംഘടനയുടെ പ്രവർത്തനങ്ങളും ലക്ഷ്യങ്ങളും വിശദീകരിച്ചു. ജോയ് അലുക്കാസ് കൺട്രി ഹെഡ് ഷിബിൻ പുതിയേടത്ത്, പാഡ്ര ഇന്റർനാഷണൽ മാർക്കറ്റിംഗ് മാനേജർ ഡയന അബുഷബാബ്, ബിഇസി എക്സ്ചേഞ്ച് ജനറൽ മാനേജർ മാത്യു വർഗീസ്, ഓണം കൺവീനർ ഷിജു ബാബു, വിമൻസ് ഫോറം ചെയർപേഴ്സൺ ഭവ്യ അനൂപ്, അഡ്വൈസറി ബോർഡ് ചെയർമാൻ എബിൻ തോമസ് എന്നിവർ ആശംസകൾ നേർന്നു.
കലാപരിപാടികളിലൂടെ പ്രശസ്ത ആർട്ടിസ്റ്റ് രെഞ്ചു ചാലക്കുടിയും കുവൈറ്റിലെ ഗായകൻ മുബാറക് അൽ റഷീദും പ്രേക്ഷകരെ ആകർഷിച്ചു. കൂടാതെ അസോസിയേഷൻ അംഗങ്ങളും കുടുംബങ്ങളും അവതരിപ്പിച്ച വിവിധ കലാപരിപാടികൾ ദിനാഘോഷത്തിന് നിറങ്ങൾ പകർന്നു. വിമൻസ് ഫോറം, എക്സിക്യൂട്ടീവ് കമ്മറ്റി, ഓണം കമ്മിറ്റി എന്നിവർ ചേർന്ന് പരിപാടികൾ ക്രമീകരിച്ചു. സമൃദ്ധമായ ഓണസദ്യയും ഒരുക്കിയിരുന്നു. ചടങ്ങിന്റെ സമാപന ഘട്ടത്തിൽ ട്രഷറർ ബിജു ജോസ് നന്ദിപ്രഭാഷണം നടത്തി.
