മുംബൈ: ബോംബെ കേരളീയ സമാജം ശനിയാഴ്ച മാട്ടുംഗ മൈസൂർ അസോസിയേഷൻ ഹാളിൽ നടത്തിയ കൈകൊട്ടിക്കളി മത്സരത്തിൽ ഡോംബിവലി കേരളീയ സമാജം ഒന്നാം സ്ഥാനത്തെത്തി. കണ്ണൂർ ഫ്രൻ്റ്സ് കൾച്ചറൽ അസോസിയേഷൻ, പൻവേൽ രണ്ടാം സ്ഥാനവും ബോംബെ യോഗക്ഷേമസഭ, ഡോംബിവലി മൂന്നാം സ്ഥാനവും കരസ്ഥമാക്കി.
മുംബൈ നഗരത്തിലും ഉപനഗരങ്ങളിലും നിന്നുമുള്ള 21 ടീമുകളാണ് മത്സരത്തിനിറങ്ങിയത്. ഒന്നാം സ്ഥാനക്കാർക്ക് 25,000 രൂപയും ഫലകവും, സാക്ഷി പത്രവും, രണ്ടാം സ്ഥാനക്കാർക്ക് 15,000 രൂപയും ഫലകവും, സാക്ഷി പത്രവും മൂന്നാം സ്ഥാനക്കാർക്ക് 10,000 രൂപയും ഫലകവും സാക്ഷി പത്രവും സമ്മാനമായി നൽകി. മത്സരിച്ച എല്ലാ ടീമുകൾക്കും 2,000 രൂപ പ്രോത്സാഹന സമ്മാനവും പ്രശസ്തി പത്രവും നൽകി.
പ്രധാന സമ്മാനങ്ങൾ ആര്യവൈദ്യ ഫാർമസി, കോയമ്പത്തൂർ സ്പോൺസർ ചെയ്തു. പ്രോത്സാഹന സമ്മാനങ്ങൾക്ക് സൗത്ത് ഇന്ത്യൻ ബാങ്കും ധനലക്ഷ്മി ബാങ്കും സ്പോൺസർമാരായിരുന്നു. രാവിലെ ഒമ്പത് മണിക്ക് സമാജം ഭാരവാഹികൾ ഭദ്രദീപം കൊളുത്തി ഉദ്ഘാടനം ചെയ്ത പരിപാടി വൈകുന്നേരം അഞ്ച് മണിക്ക് സമാപിച്ചു. സമാപന സമ്മേളനത്തിൽ പ്രസിഡന്റ് ഡോ. എസ്. രാജശേഖരൻ നായർ അദ്ധ്യക്ഷത വഹിച്ചു. സിനിമാ-സീരിയൽ താരം വീണാ നായർ വിശിഷ്ടാതിഥിയായിരുന്നു. ആര്യവൈദ്യ ഫാർമസി റീജിയണൽ മാനേജർ വിൽസൺ, സൗത്ത് ഇന്ത്യൻ ബാങ്ക് മാനേജർ റോബിൻ, റീജിയണൽ മാനേജർ രജിത്, ധനലക്ഷ്മി ബാങ്ക് മാനേജർ പ്രാജക്ത പാട്ടീൽ, വിശിഷ്ടാ തിഥിയുടെ ജീവിത പങ്കാളി വൈഷ്ണവ് എന്നിവരെ ആദരിച്ചു.
വിധികർത്താക്കളായി ശ്രീമതി രമ്യ ജഗദീഷ്, ശ്രീമതി പ്രതിഭ ജനാർദ്ദനൻ, ശ്രീമതി സംഗീത രാജൻ എന്നിവർ പ്രവർത്തിച്ചു. സമാജം സെക്രട്ടറി എ.ആർ. ദേവദാസ് സ്വാഗതവും ജോയിന്റ് സെക്രട്ടറി ടി.എ. ശശി നന്ദിയും പറഞ്ഞു. വൈസ് പ്രസിഡന്റ് കെ. ദേവദാസ്, ട്രഷറർ എം.വി. രവി, കലാ സമിതി കൺവീനർ ഹരികുമാർ കുറുപ്പ് എന്നിവർ സദസ്സ് പങ്കിട്ടു.
സമാജം നടത്തുന്ന വിവിധ സേവനപ്രവർത്തനങ്ങൾക്കൊപ്പം 14–20 പ്രായപരിധിയിലുള്ള പെൺകുട്ടികൾക്കായി കൈകൊട്ടിക്കളി പരിശീലന ക്ലാസുകൾ ആരംഭിക്കാനിരിക്കുന്നതായി സെക്രട്ടറി അറിയിച്ചു. ശ്യാം, സീവുഡ് ആയിരുന്നു പരിപാടിയുടെ അവതാരകൻ.
