ലക്നൗ: ടേക്ക് ഓഫീന് പിന്നാലെ വിമാനം തകർന്നുവീണു. ഉത്തർപ്രദേശിലെ ഫറൂഖാബാദിലാണ് സംഭവം. വിമാനത്താവളത്തിന് സമീപത്ത് വച്ചാണ് നിയന്ത്രണം നഷ്ടപ്പെട്ട് വിമാനം തകർന്നുവീണത്. വിമാനം റൺവേയിൽ നിന്ന് തെന്നിമാറുകയായിരുന്നു. നിയന്ത്രണം നഷ്ടപ്പെട്ട വിമാനം വിമാനത്താവളത്തിന് സമീപത്തെ കുറ്റിക്കാട്ടിൽ പതിച്ചു.
രണ്ട് പൈലറ്റുമാരും യാത്രക്കാരും സുരക്ഷിതരാണെന്നാണ് വിവരം. കാസിംപൂർ ഇൻഡസ്ട്രിയൽ എസ്റ്റേറ്റിൽ നിർമാണ പുരോഗതി പരിശോധിക്കാൻ എത്തിയ സ്വകാര്യ കമ്പനിയിലെ ഉദ്യോഗസ്ഥരാണ് വിമാനത്തിലുണ്ടായിരുന്നത്. ഭോപ്പാലിലേക്ക് മടങ്ങുകയായിരുന്നു സംഘം.
ജെറ്റ് ഏവിയേഷൻ കമ്പനിയുടെ ഉടമസ്ഥതയിലുള്ള വിമാനമാണ് തകർന്നത്. അത്ഭുതകരമായാണ് യാത്രക്കാർ രക്ഷപ്പെട്ടതെന്നാണ് പ്രാഥമിക വിവരം. അപകടത്തെ കുറിച്ച് കൂടുതൽ വിവരങ്ങൾ അന്വേഷിച്ചുവരികയാണ്.
