ന്യൂഡൽഹി: ഡിറ്റ് വാ ചുഴലിക്കാറ്റിനെ തുടർന്ന് ദുരിതത്തിലായ ശ്രീലങ്കയ്ക്ക് സഹായം നൽകുന്നതിൽ ഇന്ത്യൻ വ്യോമാതിർത്തി അടച്ചുവെന്ന പാകിസ്ഥാന്റെ വാദത്തെ രൂക്ഷമായി വിമർശിച്ച് വിദേശകാര്യമന്ത്രാലയം. അസംബന്ധം എന്നാണ് വിദേശകാര്യ മന്ത്രാലയം വക്താവ് രൺധീർ ജയ്സ്വാൾ വിശേഷിപ്പിച്ചത്. ഇന്ത്യയ്ക്ക് വിരുദ്ധമായി തെറ്റായ വിവരങ്ങളാണ് പാകിസ്ഥാൻ പ്രചരിപ്പിക്കുന്നതെന്ന് രൺധീർ ജയ്സ്വാൾ വ്യക്തമാക്കി.
പാകിസ്ഥാൻ വിദേശകാര്യ മന്ത്രാലയത്തിന്റെ അവകാശവാദങ്ങൾ അടിസ്ഥാനരഹിതമാണെന്നും തെറ്റായ വിവരങ്ങൾ പ്രചരിപ്പിച്ച് ഇന്ത്യയെ ആക്ഷേപിക്കാനുള്ള നീക്കമാണെന്നും വിദേശകാര്യ മന്ത്രാലയം അറിയിച്ചു.
ശ്രീലങ്കയ്ക്ക് സഹായം എത്തിക്കുന്നതിനായുള്ള പാക് വിമാനങ്ങൾ ഇന്ത്യൻ വ്യോമാതിർത്തി അനുവദിച്ചിരുന്നതായും രൺധീർ ജയ്സ്വാൾ പറഞ്ഞു. അതിർത്തി അനുവദിക്കുന്നതിനായുള്ള പാകിസ്ഥാന്റെ അപേക്ഷ, താമസമില്ലാതെ അതേദിവസം തന്നെ നടപ്പിലാക്കിയെന്നും അദ്ദേഹം കൂട്ടിച്ചേർത്തു.
ഡിസംബർ ഒന്നിന് തന്നെ യാത്രാനുമതി നൽകിയിരുന്നതായി വിദേശകാര്യ മന്ത്രാലയം വ്യക്തമാക്കി. എന്നാൽ വ്യോമാതിർത്തി തുറന്നുനൽകിയില്ല എന്നായിരുന്നു പാകിസ്ഥാന്റെ ആരോപണം.
