വിവാഹ ചടങ്ങുകൾ പോലെ പ്രധാന്യം വിവാഹ രജിസ്ട്രേഷനുമുണ്ട്. അതിനാലാണ് വിവാഹ രജിസ്ട്രേഷൻ നിശ്ചിത സമയപരിധിക്കുള്ളിൽ തന്നെ പൂർത്തിയാക്കണമെന്ന് പറയുന്നത്. 1955-ലെ ഹിന്ദു വിവാഹ നിയമം, 1954-ലെ സ്‌പെഷ്യൽ മാര്യേജ് ആക്ട് എന്നിങ്ങനെ വിവാഹ രജിസ്ട്രേഷൻ പ്രധാനമായും രണ്ട് തരത്തിലുണ്ട്. ഹിന്ദു, ബുദ്ധ, ജൈന, സിഖ് എന്നിവർക്ക് ഹിന്ദു വിവാഹ നിയമം ബാധകമാണ്. എല്ലാ സ്‌പെഷ്യൽ മാര്യേജ് ആക്ട് പ്രകാരം എല്ലാം ഇന്ത്യൻ പൗരന്മാർക്കും മതം പരിഗണിക്കാതെ രജിസ്റ്റർ ചെയ്യാവുന്നതാണ്
വിവാഹത്തിന്റെ ഔദ്യോഗിക രേഖയാണ് വിവാഹ സർട്ടിഫിക്കറ്റ്. പാസ്പോർട്ട്, വിസ, ജോയിന്റ് ബാങ്ക് അക്കൗണ്ടുകൾ എന്നിവയ്‌ക്ക് അപേക്ഷിക്കുമ്പോൾ ഇത് അത്യാവശ്യമാണ്. സ്വത്ത്, പിന്തുടർച്ചാവകാശം, വിവാഹ തർക്കങ്ങൾ എന്നിവയുമായി ബന്ധപ്പെട്ട നിയമപരമായ അവകാശങ്ങൾ നേടാൻ സഹായിക്കുന്നു.
വധുവിന് 18 വയസും വരന് 21 വയസും പൂർത്തിയായിരിക്കണം. അവിവാഹിതർക്കും, നിയമപരമായി വിവാഹമോചനം നേടിയവർക്കും, പങ്കാളികൾ മരിച്ചവർക്കും വിവാഹിതരാകാം. ദമ്പതികൾ അവരുടെ തിരിച്ചറിയൽ രേഖയും താമസസ്ഥലം തെളിയിക്കുന്ന രേഖയും നൽകണം. വധുവിന്റെയോ വരന്റെയോ താമസ്ഥലത്താണ് വിവാഹം രജിസ്റ്റർ ചെയ്യേണ്ടത്.
വിവാഹ രജിസ്‌ട്രേഷന് ആവശ്യമായ രേഖകൾ
1. വധുവും വരനും ഒപ്പിട്ട അപേക്ഷാ ഫോം
2. പ്രായം തെളിയിക്കുന്ന രേഖ
3. മേൽവിലാസം തെളിയിക്കുന്ന രേഖ
4. വിവാഹ തീയതി, സ്ഥലം, സാക്ഷികൾ എന്നിവ വ്യക്തമാക്കുന്ന വിവാഹ സത്യവാങ്മൂലം
5. ദമ്പതികളുടെ ഫോട്ടോകൾ
6. വിവാഹ ക്ഷണക്കത്ത് (നിർബന്ധമല്ല)
7. വിവാഹ നില വ്യക്തമാക്കുന്ന സത്യവാങ്മൂലം
8. 3 സാക്ഷികളുടെ തിരിച്ചറിയൽ രേഖകൾ
ദമ്പതികൾക്ക് സബ് ഡിവിഷണൽ മജിസ്ട്രേറ്റ് ഓഫീസ്, വിവാഹ രജിസ്ട്രാർ ഓഫീസ് എന്നിവിടങ്ങളിൽ നേരിട്ടെത്തി അപേക്ഷാ ഫോം സമർപ്പിക്കാം. കേരളം ഉൾപ്പെടെ പല സംസ്ഥാനങ്ങളിലും ഔദ്യോഗിക സർക്കാർ പോർട്ടൽ വഴി ഓൺലൈൻ രജിസ്‌ട്രേഷനും അനുവദിക്കുന്നുണ്ട്.
