വിവാഹം നടക്കാൻ ആഗ്രഹിച്ചിട്ടും പലവിധ കാരണങ്ങളാൽ കല്യാണം മുടങ്ങി പോകുകയോ നീണ്ടു പോകുയോ ചെയ്യുന്ന സ്ത്രീ പുരുഷന്മാർ ഏറെയാണ്. അത്തരം ഭക്തർക്ക് ദർശനം നടത്താൻ പറ്റിയ ക്ഷേത്രങ്ങളിൽ ചിലതാണ് തിരുവഞ്ചിക്കുളം മഹാദേവ ക്ഷേത്രം , ഉമാ മഹേശ്വര സ്വാമി ക്ഷേത്രം, ആറ്റുകാൽ ഭഗവതി ക്ഷേത്രം എന്നിവ.
ശിവ-പാർവതി ക്ഷേത്രദർശനം വിവാഹത്തിനുള്ള കാലതാമസം പരിഹരിക്കാൻ സഹായിക്കുമെന്നാണ് വിശ്വാസം. അത്തരം ശിവ പാർവതി ക്ഷേത്രങ്ങളിലൊന്നാണ് തൃശൂർ ജില്ലയിലെ തിരുവഞ്ചിക്കുളം മഹാദേവ ക്ഷേത്രം. ഇവിടുത്തെ പ്രധാന വഴിപാടാണ് പള്ളിയറപൂജ. നിത്യേന പള്ളിയറ പൂജ നടക്കുന്ന കേരളത്തിലെ രണ്ട് ക്ഷേത്രങ്ങളിലൊന്നാണ് ഈ ക്ഷേത്രം. വിവാഹം വൈകുന്ന ഭക്തർ ഇവിടെ പള്ളിയറ പൂജ നേർന്നാൽ വിവാഹതടസ്സം മാറി ഉടൻ വിവാഹം നടക്കുമെന്നും വിവാഹിതരായിട്ടുള്ളവർ ഇവിടെ വന്ന് പള്ളിയറ പൂജയിൽ പങ്കെടുത്തു പ്രാർത്ഥിച്ചാൽ ഭഗവാൻ ദീർഘമാംഗല്യം പ്രദാനം ചെയ്യുമെന്നുമാണ് വിശ്വാസം.
വിവാഹപ്രശ്നങ്ങൾ പരിഹരിക്കുന്നതിനായി പ്രത്യേക പൂജകൾ നടത്തുന്ന മറ്റൊരു ക്ഷേത്രമാണ് കൊല്ലത്തെ ഉമാ മഹേശ്വര ക്ഷേത്രം. സ്വയംവര അർച്ചന, ഐശ്വര്യ പൂജ, ഉമാ മഹേശ്വര പൂജ, ഗണപതി ഹോമം എന്നിവയാണ് ഇവിടുത്തെ പ്രധാനവഴിപാടുകൾ. ജാതകത്തിലെ പ്രശ്നങ്ങൾക്ക് പരിഹാരം ലഭിക്കാനും നല്ല വിവാഹബന്ധം ലഭിക്കുന്നതിനും ഇവിടെ ആരാധിക്കുന്നത് ഉത്തമമെന്നാണ് വിശ്വാസം. ദമ്പതികൾ തമ്മിലുള്ള തെറ്റിദ്ധാരണമാറി സന്തോഷപൂർണമായ ജീവിതം മുന്നോട് പോകുവാൻ സംവാദ സൂക്ത മന്ത്ര പുഷ്പാഞ്ജലി നടത്തുന്നത് എല്ലാ പ്രശ്‌നങ്ങളും പരിഹരിക്കും.
തിരുവനന്തപുരം ജില്ലയിലെ ആറ്റുകാൽ ഭഗവതി ക്ഷേത്രം ഭക്തർക്കിടയിലേറെ പ്രചാരത്തിലുള്ള ക്ഷേത്രമാണ്. ആറ്റുകാൽ പൊങ്കാല ഇവിടുത്തെ പ്രധാന വഴിപാട് ആണ്. ഈ വഴിപാട് വിവാഹം ഉൾപ്പെടെയുള്ള വിവിധ വിഷയങ്ങളിൽ ഭഗവതിയുടെ അനുഗ്രഹം ലഭിക്കുവാനായി സ്ത്രീകൾ നടത്തുന്നു.
ഇവ കൂടാതെ ആലപ്പുഴ ജില്ലയിലെ ചക്കുളത്തുകാവ് ക്ഷേത്രവും വിവാഹത്തിനും നല്ല ജീവിതത്തിനുള്ള അനുഗ്രഹങ്ങൾക്കും വേണ്ടി ഭക്തർ ചെന്നെത്തുന്ന ക്ഷേത്രങ്ങളിലൊന്നാണ്.
