ന്യൂഡല്‍ഹി: കോവിഡ് മഹാമാരിയുണ്ടാക്കിയ സാമ്പത്തിക പ്രതിസന്ധികളെ മറികടന്ന് ഇന്ത്യന്‍ സമ്പദ്ഘടന ശക്തമായ വളര്‍ച്ച തുടരുകയാണെന്ന് സാമ്പത്തിക വിദഗ്ധരുടെ വിലയിരുത്തല്‍. 2021 മുതല്‍ 2025 വരെയുള്ള കാലയളവില്‍ ഇന്ത്യ കൈവരിച്ച ശരാശരി വാര്‍ഷിക വളര്‍ച്ച 7.83 ശതമാനമാണെന്ന് കൊറിയ ഇന്‍സ്റ്റിറ്റ്യൂട്ട് ഫോര്‍ ഇന്റര്‍നാഷണല്‍ ഇക്കണോമിക് പോളിസിയിലെ ഇന്ത്യ-ദക്ഷിണേഷ്യ വിഭാഗം മേധാവി ക്യുങ്ഹൂണ്‍ കിം ചൂണ്ടിക്കാട്ടി. എക്‌സിലൂടെയാണ് അദ്ദേഹം നിരീക്ഷണങ്ങള്‍ പങ്കുവെച്ചത്.
കോവിഡ് മഹാമാരിയുടെ കാലത്ത് 5.8 ശതമാനം സാമ്പത്തിക തകര്‍ച്ച നേരിട്ട ഇന്ത്യ 2021ല്‍ 9.7 ശതമാനം വളര്‍ച്ചയോടെ ശക്തമായി തിരിച്ചെത്തിയതായി കിം പറഞ്ഞു. തുടര്‍ന്നുള്ള നാല് വര്‍ഷങ്ങളിലും ഏഴ് ശതമാനത്തിന് മുകളില്‍ വളര്‍ച്ച രേഖപ്പെടുത്താന്‍ രാജ്യത്തിന് കഴിഞ്ഞു. ഓരോ പാദത്തിലെയും മൊത്ത ആഭ്യന്തര ഉല്‍പ്പാദന (ജിഡിപി) കണക്കുകള്‍ പുറത്തുവരുമ്പോഴും താനുള്‍പ്പെടെയുള്ള സാമ്പത്തിക വിദഗ്ധര്‍ വളര്‍ച്ചാ പ്രവചനങ്ങള്‍ ഉയര്‍ത്തേണ്ടിവന്നതായും അദ്ദേഹം വ്യക്തമാക്കി.
തുടര്‍ച്ചയായി അഞ്ച് വര്‍ഷം ഏഴ് ശതമാനത്തിന് മുകളില്‍ വളര്‍ച്ച കൈവരിച്ചത് ഇന്ത്യന്‍ സമ്പദ്ഘടനയുടെ മുന്നേറ്റം വ്യക്തമാക്കുന്നതാണെന്ന് കിം വിലയിരുത്തി. ബ്രിക് രാജ്യങ്ങളിലൊന്നായി ഇന്ത്യ ആഗോള ശ്രദ്ധ നേടിയ 2003-2007 കാലഘട്ടത്തിലെ വളര്‍ച്ചാ നിരക്കിനോട് അടുത്തുനില്‍ക്കുന്നതാണ് നിലവിലെ കണക്കുകള്‍. 2021-2025 കാലയളവിലെ ശരാശരി വാര്‍ഷിക വളര്‍ച്ച 7.83 ശതമാനമാണെന്നും 1960 മുതലുള്ള കണക്കുകള്‍ പരിശോധിക്കുമ്പോള്‍ അഞ്ച് വര്‍ഷത്തെ ശരാശരി വളര്‍ച്ചയിലെ രണ്ടാമത്തെ ഉയര്‍ന്ന നിരക്കാണിതെന്നും അദ്ദേഹം ചൂണ്ടിക്കാട്ടി. 20032007 കാലയളവില്‍ രേഖപ്പെടുത്തിയ 7.89 ശതമാനമാണ് ഇതിനെക്കാള്‍ ഉയര്‍ന്ന നിരക്ക്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
നിലവിലെ വളര്‍ച്ചാ പ്രവചനങ്ങള്‍ യാഥാര്‍ഥ്യമാവുകയാണെങ്കില്‍ ഇന്ത്യയ്‌ക്ക് മുന്‍കാല റെക്കോര്‍ഡ് മറികടക്കാനാകുമെന്നും കിം അഭിപ്രായപ്പെട്ടു. അന്താരാഷ്‌ട്ര നാണയനിധി (ഐഎംഎഫ്), ഏഷ്യന്‍ വികസന ബാങ്ക് (എഡിബി), ലോകബാങ്ക് തുടങ്ങിയ പ്രമുഖ സ്ഥാപനങ്ങള്‍ അടുത്തിടെ ഇന്ത്യയുടെ നടപ്പുവര്‍ഷത്തെയും അടുത്ത വര്‍ഷത്തെയും സാമ്പത്തിക വളര്‍ച്ചാ പ്രവചനങ്ങള്‍ ഏഴ് ശതമാനത്തിന് മുകളിലേക്ക് ഉയര്‍ത്തിയതായും കിം ചൂണ്ടിക്കാട്ടി. ഇന്ത്യയുടെ വളര്‍ച്ചാ നിരക്കിനെക്കുറിച്ചുള്ള പ്രവചനങ്ങള്‍ തുടര്‍ച്ചയായി ഉയരുന്നത് ശ്രദ്ധേയമാണെന്നും അദ്ദേഹം വിലയിരുത്തി.
