ന്യൂഡല്‍ഹി: ഡല്‍ഹിയില്‍ ഇറങ്ങുന്നതിനിടെ എമിറേറ്റ്‌സ് വിമാനത്തില്‍ പക്ഷിയിടിച്ചു. ഒക്ടോബര്‍ 17ന് ദുബായില്‍നിന്ന് ഡല്‍ഹിയിലെത്തിയ വിമാനത്തിനാണ് പക്ഷിയിടിച്ചത്. തുടര്‍ന്ന് വിമാനത്തിന്റെ അറ്റകുറ്റപ്പണികള്‍ക്കായി ദുബായിലേക്കുള്ള മടക്ക സര്‍വീസ് വൈകി. മടക്കയാത്രയ്‌ക്കുള്ള ഇകെ517 വിമാനത്തിന്റെ സര്‍വീസ് വൈകുമെന്ന് എമിറേറ്റ്‌സ് അറിയിച്ചു. ആവശ്യമായ അറ്റകുറ്റപ്പണികള്‍ പൂര്‍ത്തിയാക്കിയ ശേഷമേ വിമാനം പുറപ്പെടുകയുള്ളൂ. യാത്ര തടസ്സപ്പെട്ടവര്‍ക്ക് ഹോട്ടല്‍ താമസസൗകര്യം ഒരുക്കുന്നുണ്ട്. ഒക്ടോബര്‍ 18ന് പ്രാദേശിക സമയം രാവിലെ ഏഴുമണിയോടെ വിമാനം പുറപ്പെടുമെന്നാണ് നിലവിലെ അറിയിപ്പ്.
വിമാനത്തിലെ യാത്രക്കാരുടെയും ജീവനക്കാരുടെയും സുരക്ഷയ്‌ക്കാണ് മുന്‍ഗണനയെന്നും സംഭവത്തെത്തുടര്‍ന്ന് യാത്രക്കാര്‍ക്കുണ്ടായ അസൗകര്യത്തില്‍ ഖേദിക്കുന്നതായും എമിറേറ്റ്‌സ് വ്യക്തമാക്കി. സുരക്ഷയില്‍ വിട്ടുവീഴ്ച ചെയ്യില്ലെന്നും കമ്പനി അറിയിച്ചു. ഇതിനിടെ, ഒക്ടോബര്‍ 14ന് ഫ്രാങ്ക്ഫര്‍ട്ടില്‍നിന്ന് ഡല്‍ഹിയിലേക്ക് വരികയായിരുന്ന എയര്‍ ഇന്ത്യ വിമാനം സംശയാസ്പദമായ ഹൈജാക്ക് മുന്നറിയിപ്പിനെത്തുടര്‍ന്ന് ജയ്പൂരിലേക്ക് തിരിച്ചുവിട്ടിരുന്നു. ബോയിങ് 787-9 വിമാനമായ എഐ2030 രാവിലെ 9.35ഓടെ ജയ്പൂരില്‍ സുരക്ഷിതമായി ഇറങ്ങി. 293 യാത്രക്കാരും 13 ജീവനക്കാരുമാണ് വിമാനത്തിലുണ്ടായിരുന്നത്. സുരക്ഷാ പരിശോധനകള്‍ക്കായി വിമാനം പ്രത്യേക സ്ഥലത്തേക്ക് മാറ്റുകയും യാത്രക്കാരെ പുറത്തിറക്കി പരിശോധിക്കുകയും ചെയ്തു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പരിശോധനകള്‍ക്കുശേഷം സുരക്ഷാ ഏജന്‍സികള്‍ വിമാനത്തിനും ജീവനക്കാര്‍ക്കും അനുമതി നല്‍കി. തുടര്‍ന്ന് യാത്രക്കാര്‍ വീണ്ടും വിമാനത്തില്‍ കയറി ഡല്‍ഹിയിലേക്കുള്ള യാത്ര തുടര്‍ന്നു. സംഭവത്തെത്തുടര്‍ന്ന് യാത്ര മണിക്കൂറുകളോളം വൈകി. മുന്നറിയിപ്പിന് കാരണമെന്തെന്ന് കണ്ടെത്താന്‍ ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അന്വേഷണം ആരംഭിച്ചിട്ടുണ്ട്. സാങ്കേതിക തകരാറാകാം കാരണമെന്ന തരത്തിലുള്ള റിപ്പോര്‍ട്ടുകള്‍ പുറത്തുവന്നെങ്കിലും കൃത്യമായ കാരണം അന്വേഷണത്തിലാണെന്നാണ് വിവരം.
