തിരുവനന്തപുരം: ഫുട്ബോൾ ഇതിഹാസം ലയണൽ മെസിയെ കേരളത്തിൽ കൊണ്ടുവരും എന്ന് പറഞ്ഞ് റിപ്പോർട്ടർ ബ്രോഡ്കാസ്റ്റിംഗ് കമ്പനി മുതലാളി ആൻറോ അഗസ്റ്റിനും കായികമന്ത്രി അബ്ദുറഹിമാനും ഉണ്ടാക്കിയ ബഹളം ചില്ലറയില്ല. വാർത്താ സമ്മേളനം വിളിച്ച് ആദ്യം നവംബറിൽ വരും എന്ന് പറഞ്ഞ് മലയാളിയെ പറ്റിച്ചു, പിന്നീട് മാർച്ചിൽ വരും എന്ന് പറഞ്ഞു. അതിനിടെ മെസിയും സംഘവും ഇന്ത്യയിലെ വിവിധ സംസ്ഥാനങ്ങളിൽ എത്തുകയും ചെയ്തു. മാർച്ച് മാസം അവസാനിക്കാൻ ഇനി ദിവസങ്ങൾ മാത്രം ബാക്കി നിൽക്കേ രാഷ്ട്രീയ നിരീക്ഷകൻ ശ്രീജിത്ത് പണിക്കർ സോഷ്യൽ മീഡിയയിൽ പങ്കുവച്ച കുറിപ്പാണ് ശ്രദ്ധേയമാകുന്നത്.
ശ്രീജിത്ത് പണിക്കരുടെ കുറിപ്പ്
ഈ അവസരത്തിൽ പറയാൻ പാടുണ്ടോ എന്നറിയില്ല; ട്രീപോർട്ടർ മൊയിലാളിയോടാണ്. അർജന്റീന ഫുട്ബോൾ ടീമിന്റെ മാർച്ചിലെ വിൻഡോയും കഴിയാറായി.
ഖത്തറിൽ നടക്കേണ്ടിയിരുന്ന അർജന്റീന – സ്പെയിൻ മത്സരം ഉപേക്ഷിക്കപ്പെട്ടു. പകരം മാർച്ച് 31ന് ഗ്വാട്ടിമാലയുമായി അവർ കളിക്കുന്നുണ്ട്.
അതോടെ മാർച്ച് വിൻഡോ ഖതം. ഇനിയെങ്കിലും നിങ്ങൾ പറഞ്ഞതെല്ലാം ഭൂലോക ഉടായിപ്പ് ആയിരുന്നെന്ന് സമ്മതിക്കൂ. മ്മടെ അബ്ദുറൈമാൻ സാഹിബ് താനൂരിലെ വിൻഡോ വേണ്ടെന്നുവച്ച് തിരൂരിലെ വിൻഡോ നോക്കുകയാണ്.
മരംമുറി ടീമും ഏതെങ്കിലും വിൻഡോയിലൂടെ പുറത്തുചാടാൻ നോക്കുക. മാങ്ങായുടെ ഫോണും മെസ്സിയുടെ ഫുട്ബോളും പോലെയുള്ള ഉടായിപ്പുമായി മേലാൽ ഇറങ്ങരുതെന്ന് അപേക്ഷ!
