മനാമ: ബഹ്റൈൻ പ്രവാസലോകത്തിന് അഭിമാനമായി പ്രമുഖ സാഹിത്യകാരൻ റോയി പൂച്ചേരിൽ “കാവ്യപ്രതിഭ” പുരസ്കാരത്തിന് തിരഞ്ഞെടുക്കപ്പെട്ടു. കഴിഞ്ഞ മൂന്നു വർഷം തുടർച്ചയായി മികച്ച കവിതയ്‌ക്കുള്ള സമ്മാനം റോയിക്കു ലഭിച്ചിരുന്നു.
“പുലരിയെച്ചേർക്കുന്ന പകൽ” എന്ന കവിതയ്‌ക്കാണ് ഈ വർഷത്തെ സമ്മാനം. കഴിഞ്ഞ മാസം നടന്ന എസ്. കെ. പൊറ്റെക്കാട്ട് സ്മാരക സമിതിയുടെ രചനാ മത്സരത്തിലും റോയിയുടെ “ആത്മഹത്യ” എന്ന കവിത ഒന്നാം സ്ഥാനം നേടിയിരുന്നു കൂടാതെ “അക്ഷരമുറ്റത്തെ ശലഭങ്ങൾ” എന്ന കവിത 2026-27 അധ്യയന വർഷത്തെ സിബിഎസഇ പാഠ്യ പദ്ധതിയിൽ ഉൾപ്പെടുത്തിയിട്ടുണ്ട്.
ബഹ്റൈനിലെ സാംസ്കാരിക, സാഹിത്യ മേഖലകളിൽ വളരെക്കാലമായി റോയി പൂച്ചേരിൽ തന്റെ കവിതകളിലൂടെയും മറ്റ് പ്രവർത്തനങ്ങളിലൂടെയും സജീവമാണ്. ശിഹാബുദ്ദീൻ പൊയ്‌ത്തുംകടവ്, സന്തോഷ് എച്ചിക്കാനം, റോസ് മേരി, ഉണ്ണി അമ്മയമ്പലം എന്നിവരടങ്ങിയ ജൂറിയാണ് പുരസ്കാര ജേതാക്കളെ നിശ്ചയിച്ചത്. ഏപ്രിൽ 4 ന് വൈകിട്ട് തൃശ്ശൂർ സാഹിത്യ അക്കാദമിയിലെ, ചങ്ങമ്പുഴ ഹാളിൽ നടക്കുന്ന ചടങ്ങിൽ കേരള സാഹിത്യ അക്കാദമി പ്രസിഡണ്ട്, സച്ചിദാനന്ദൻ പുരസ്കാരങ്ങൾ വിതരണം ചെയ്യും.
