ജമ്മു: ജമ്മുവിലെ അതീവ സുരക്ഷാ മേഖലയായ സൈനിക താവളത്തില് കടക്കാന് അനുമതിയുള്ള സ്കൂള് വാന് ഡ്രൈവറെ സംശയാസ്പദമായ സാഹചര്യത്തില് സൈന്യം പിടികൂടി. ഇയാളുടെ മൊബൈല് ഫോണില് പാകിസ്താനി നമ്പറുകള് കണ്ടെത്തിയതിനെത്തുടര്ന്നാണ് നടപടി. ജമ്മുവിലെ സൈനിക താവളത്തിന് അകത്തുള്ള ആര്മി പബ്ലിക് സ്കൂളിലെ വാന് ഡ്രൈവറായ തൗസീഫ് എന്നയാളാണ് പിടിയിലായത്. സൈനിക താവളത്തിന്റെ ബി-ഗേറ്റില് നടന്ന പതിവ് സുരക്ഷാ പരിശോധനയ്ക്കിടെയാണ് ഇയാള് കുടുങ്ങിയത്.
ഇയാളുടെ ഫോണ് പരിശോധിച്ചപ്പോള് പാകിസ്താന് കേന്ദ്രീകരിച്ചുള്ള മൂന്ന് മൊബൈല് നമ്പറുകള് കണ്ടെത്തി. ‘ചാച്ച ഗുജ്റ’, ‘അഹ്മി, ‘അലി ഭായ്’ എന്നീ പേരുകളിലാണ് ഈ നമ്പറുകള് സേവ് ചെയ്തിരുന്നത്. സ്കൂള് ഡ്രൈവര് എന്ന നിലയില് സൈനിക താവളത്തിനുള്ളിലേക്ക് പ്രവേശിക്കാന് അധികൃതര് നല്കിയ ഔദ്യോഗിക തിരിച്ചറിയല് കാര്ഡും ഇയാളുടെ പക്കലുണ്ടായിരുന്നു. അതീവ സുരക്ഷാ മേഖലകളില് തടസ്സമില്ലാതെ കടന്നുചെല്ലാന് അനുമതിയുള്ള വ്യക്തിയില് നിന്ന് ഇത്തരം നമ്പറുകള് കണ്ടെത്തിയത് ഗൗരവത്തോടെയാണ് സൈന്യം കാണുന്നത്.
സംഭവത്തെത്തുടര്ന്ന് സുരക്ഷാ ഏജന്സികളും രഹസ്യാന്വേഷണ വിഭാഗവും ഇയാളെ വിശദമായി ചോദ്യം ചെയ്തുവരികയാണ്. പാകിസ്താനി നമ്പറുകളുമായി ഇയാള്ക്ക് എന്ത് ബന്ധമാണുള്ളതെന്നും ഏതെങ്കിലും തരത്തിലുള്ള വിവരങ്ങള് ചോര്ത്തി നല്കിയിട്ടുണ്ടോ എന്നും ഏജന്സികള് പരിശോധിക്കുന്നുണ്ട്. പ്രാദേശികവാസിയായ തൗസീഫിനെക്കുറിച്ച് കൂടുതല് വിവരങ്ങള് ശേഖരിച്ചുവരികയാണെന്നും സൈനിക വൃത്തങ്ങള് അറിയിച്ചു. രാജ്യത്തെ തന്ത്രപ്രധാനമായ സൈനിക കേന്ദ്രങ്ങളില് സിവില് ജീവനക്കാരുടെ സുരക്ഷാ പരിശോധനകള് കര്ശനമാക്കുന്നതിനിടയിലാണ് ഈ സംഭവം. ഇയാളുടെ ഫോണ് രേഖകള് വിശദമായ ഫോറന്സിക് പരിശോധനയ്ക്ക് വിധേയമാക്കാനാണ് തീരുമാനം.
