ന്യൂഡൽഹി: പാർലിമെന്റിൽ അവതരിപ്പിക്കാൻ പോകുന്ന നാരി ശക്തി വന്ദൻ അധിനിയം എന്നറിയപ്പെടുന്ന വനിതാ സംവരണ നിയമത്തിലെ ഭേദഗതികൾ ഒരേ സ്വരത്തിൽ പാസാക്കുന്നതിന് ഒത്തുചേരണമെന്ന് എല്ലാ അംഗങ്ങളോടും മോദി ആവശ്യപ്പെട്ടു. വനിതാ സംവരണ നിയമം അതിന്റെ യഥാർത്ഥ അർത്ഥത്തിൽ നടപ്പിലാക്കേണ്ട സമയം അതിക്രമിച്ചിരിക്കുന്നുവെന്നും 2029 ലെ ലോക്‌സഭാ തിരഞ്ഞെടുപ്പുകളും നിയമസഭാ തിരഞ്ഞെടുപ്പുകളും സ്ത്രീകൾക്കുള്ള സംവരണം നിലവിൽ വരുത്തിയാണ് നടത്തുന്നതെന്നും പ്രധാനമന്ത്രി നരേന്ദ്ര മോദി പറഞ്ഞു.
“വിപുലമായ ആലോചനകൾക്ക് ശേഷം, നാരീ ശക്തി വന്ദൻ അധിനിയം അതിന്റെ യഥാർത്ഥ ആത്മാവിൽ രാജ്യമെമ്പാടും നടപ്പിലാക്കേണ്ട സമയം അതിക്രമിച്ചിരിക്കുന്നു എന്ന നിഗമനത്തിലെത്തി.”
“2029 ലെ ലോക്‌സഭാ തിരഞ്ഞെടുപ്പുകളും നിയമസഭാ തിരഞ്ഞെടുപ്പുകളും വനിതാ സംവരണം നടപ്പിലാക്കിക്കൊണ്ട് നടത്തേണ്ടത് അത്യാവശ്യമാണ്,” ഏപ്രിൽ 11 ന് എഴുതിയ കത്തിൽ പ്രധാനമന്ത്രി പറഞ്ഞു.സ്ത്രീകൾക്കും ഭാവി തലമുറയ്‌ക്കും വേണ്ടി ഉത്തരവാദിത്തത്തോടെ പ്രവർത്തിക്കാനും വനിതാ സംവരണ ബിൽ നടപ്പിലാക്കാനും അദ്ദേഹം പാർട്ടികളോട് അഭ്യർത്ഥിച്ചു.
“രാഷ്‌ട്രീയത്തിൽ സ്ത്രീകളുടെ പ്രാതിനിധ്യം വർദ്ധിപ്പിക്കുക എന്നത് എല്ലാ രാഷ്ട്രീയ പാർട്ടികളുടെയും ദീർഘകാല ആഗ്രഹമാണെങ്കിലും, ആ അഭിലാഷം യാഥാർത്ഥ്യമാകേണ്ട സമയം അതിക്രമിച്ചിരിക്കുന്നു. ഇത് രാജ്യത്തിന്റെ സ്ത്രീശക്തിക്കും 140 കോടി ഇന്ത്യക്കാർക്കും ഒരു വലിയ നേട്ടമായിരിക്കും. നാമെല്ലാവരും ഒത്തുചേർന്ന് ഈ ചരിത്ര നേട്ടം സൃഷ്ടിക്കുമെന്ന് എനിക്ക് പൂർണ്ണ വിശ്വാസമുണ്ട്,” അദ്ദേഹം പറഞ്ഞു.
“സ്ത്രീകൾക്ക് മുന്നേറാനും തീരുമാനങ്ങൾ എടുക്കാനും നയിക്കാനും അവസരം ലഭിക്കുമ്പോൾ മാത്രമേ ഏതൊരു സമൂഹത്തിനും പുരോഗതി കൈവരിക്കാൻ കഴിയൂ,” “ഒരു വികസിത രാജ്യമാകാനുള്ള ഇന്ത്യയുടെ സ്വപ്നം സാക്ഷാത്കരിക്കുന്നതിന്, ഈ യാത്രയിൽ സ്ത്രീകൾ പ്രമുഖവും ഊർജ്ജസ്വലവുമായ പങ്ക് വഹിക്കേണ്ടത് അത്യാവശ്യമാണ്.” അദ്ദേഹം കത്തിൽ പറഞ്ഞു.
ഏപ്രിൽ 16 മുതൽ 18 വരെ 3 ദിവസത്തേക്ക് നടക്കുന്ന പാർലമെന്റിന്റെ പ്രത്യേക സമ്മേളനത്തിൽ വനിതാ സംവരണ ഭേദഗതി ബില്ല് അവതരിപ്പിക്കപ്പെടുമെന്നു പ്രതീക്ഷിക്കുന്നു. വനിതാ സംവരണ നിയമം ലോക്‌സഭാ സീറ്റുകളുടെ എണ്ണം 816 ആയി വർദ്ധിപ്പിക്കുമെന്നും , അതിൽ 273 എണ്ണം സ്ത്രീകൾക്കായി സംവരണം ചെയ്യുമെന്നുമാണ് സൂചന .
2023-ൽ ഭരണഘടന ഭേദഗതി ചെയ്തുകൊണ്ടാണ് ലോക്‌സഭയിലും സംസ്ഥാന നിയമസഭകളിലും സ്ത്രീകൾക്ക് 33 ശതമാനം സംവരണം നൽകുന്നതിനുള്ള വ്യവസ്ഥ കൊണ്ടുവന്നത്. എന്നിരുന്നാലും, 2027 ലെ സെൻസസിന്റെ അടിസ്ഥാനത്തിൽ ഡീലിമിറ്റേഷൻ പ്രക്രിയ പൂർത്തിയായതിനുശേഷം മാത്രമേ വനിതാ ക്വാട്ട പ്രാബല്യത്തിൽ വരൂ. നിലവിലെ നിയമം അതേപടി തുടർന്നാൽ 2034 ന് മുമ്പ് സംവരണം നടപ്പിലാക്കാൻ കഴിയുമായിരുന്നില്ല എന്നാണ് ഇതിനർത്ഥം.
എന്നാൽ ഭരണഘടനാ ഭേദഗതികൾ ചർച്ച ചെയ്യാൻ ഒരു സർവകക്ഷി യോഗം വിളിക്കണമെന്ന് ആവശ്യപ്പെട്ട് കോൺഗ്രസ് നേതാവും രാജ്യസഭയിലെ പ്രതിപക്ഷ നേതാവുമായ ഖാർഗെ പ്രധാനമന്ത്രി മോദിക്ക് കത്തെഴുതിയിട്ടുണ്ട്.
